Kúıeýinen ázer qashyp qutylǵan Aqtaý turǵyny polıtseılerdiń áreketsizdigine narazy
AQTAÝ. KAZINFORM – Kúıeýiniń úzdiksiz soqqysynan áreń qashyp qutylǵan aqtaýlyq kóp balaly ana beınejazba arqyly kómek surady. Ol quqyq qorǵaý organdaryn áreketsizdigi úshin aıyptap, prokýratýradan járdem surap otyr.
Araılymnyń beıneúndeýin qordyń prezıdenti Dına Tańsári jarııalady. Onda jábirlenýshi Araılym kúıeýiniń ústinen sotta eshqandaı is qozǵalmaǵany týraly resmı aqparat alǵanyna qapaly ekenin aıtady. Kúıeýi osy ýaqytqa deıin 2-yqshamaýdandaǵy ýchaskelik pýnktte birneshe ret bolsa da, quqyq qorǵaý organdary ony turǵylyqty jeri boıynsha áli taba almaı otyrǵanyn túsindirip, qorǵaý nusqamasy áli shyqpaǵanyn aıtqan.
«Meniń ústimnen qylmystyq is qozǵaldy, onda kúıeýim meni aqsha jymqyrdy dep negizsiz aıyp taǵyp otyr. Maǵan Astanada kýálik etýge ruqsat bere turyp, sol ýaqytta polıtsııa bóliminiń aǵa tergeýshisinen meni Aqtaýǵa ákelý týraly qaýly alamyn», — deıdi Araılym.
Kópbalaly ana kúıeýi ony tamyr-tanys arqyly bala-shaǵasyna, aqshaǵa qatysty birneshe ret qorqytyp-úrkitkenin aıtady.
«Qorǵaý nusqamasyn taýyp bere almaǵan ýchaskelik ınspektor Abzal Qyrǵabaqovtyń ústinen qyzmettik tergeý bastaýdy suraımyn. Aqtaý qalalyq ІІB aǵa tergeýshisiniń meni qalaǵa májbúrlep ákelý týraly qaýlysynyń kúshin joıýdy talap etemin. Sebebi, kámeletke tolmaǵan balalarym bar jáne olardy ózim asyrap, baǵyp-qaǵyp otyrǵandyqtan, men olardy jalǵyz qaldyra almaımyn. Maǵan turǵylyqty jerim boıynsha kýálik berýge ruqsat berilsin. Men sońǵy jaǵdaılardan keıin quqyq qorǵaý qyzmetkerlerine senbeımin. Bir aı boıy barlyq bólim basshylary men polıtsııa bólimshelerinen kómek surap, maǵan járdemdesýin, qorǵaýyn suradym. Attaryn jipke tizip bere alamyn. Mende olardyń osy oqıǵaǵa qatysy baryn dáleldeıtin naqty dálelder bar. Olar meni barynsha raıymnan qaıtýǵa sendirgisi keldi. Solardyń kesirinen qaladan ketýge májbúr boldym», — deıdi Araılym.
Áıel Mańǵystaý oblysynyń prokýratýrasyna isti jeke baqylaýǵa alyp, óziniń jáne balalarynyń jeke qaýipsizdigin qamtamasyz etetin barlyq tıimdi sharalardy tez arada qabyldaýyn surap, aryzdanǵan.
Esterińizge sala keteıik, úsh balanyń anasy Araılym kúıeýiniń qoqan-loqqysy men qýdalaýynan qorqyp, Aqtaýdan qashýǵa májbúr bolǵan. Soqqydan keıin polıtsııanyń qorǵaý týraly buıryǵy ókinishke qaraı kúıeýiniń minez-qulqyna eshqandaı áser etpegen. Jábirlenýshi sondaı-aq kúıeýi ony áli ańdyp, kóliginiń terezesin syndyrǵanyn aıtqan.
Aqtaý qalasynyń Polıtsııa departamenti er adamǵa qatysty QR ÁQBtK-niń 434-baby boıynsha ákimshilik hattama toltyrylǵanyn habarlady. Ol sondaı-aq qorǵaý tártibin buzǵany úshin qamaýǵa alý túrindegi jazaǵa kesildi.
Materıal 10 táýlikke qamaýǵa alý týraly uıǵarymmen sot organyna jiberildi. Alaıda jábirlenýshiniń kúıeýi taǵylǵan aıyptarǵa kelispeı, jala dep otyr.
