Kúıeýin túrmeden shyǵaryp almaq bolǵan aqtóbelik áıel 112 mln teńgesinen aıyryldy

AQTÓBE. KAZINFORM – Aqtóbe qalasynyń turǵyny temir torda otyrǵan kúıeýin bostandyqqa shyǵaryp almaq bolyp, alaıaqqa aldyndy. Ol apellıatsııalyq sot arqyly kómek kórsetýge ýáde bergen adamǵa 112 mln teńge aqsha tólegen.

Aqtóbe qalasynyń № 2 sotynda Qylmystyq kodekstiń «Alaıaqtyq» baby boıynsha is qaraldy. Іs materıalyna súıensek, 2022 jyldyń shilde aıy men 2023 jyldyń qyrkúıegi aralyǵynda sottalýshy jábirlenýshiden 112 mln teńge alǵan. Sottalýshy túrmede otyrǵan jazasyn óteýshini apellıatsııalyq sot arqyly bosatýǵa kómek kórsetetinin aıtqan. Tipti quqyq qorǵaý organdary men UQK-da tanystary bar ekenin jetkizgen. 

— Qylmystyq áreketterdiń nátıjesinde jábirlenýshige 112 mln teńge somasynda materıaldyq shyǵyn keltirildi. Sot otyrysynda sottalýshy óz kinásin moıyndamady. Sot úkimimen sottalýshy kináli dep tanylyp, oǵan 9 jyl merzimge bas bostandyǵynan aıyrý túrindegi jazasyn taǵaıyndady. Jábirlenýshiniń azamattyq talaby tolyq kólemde qanaǵattandyryldy. Sot úkimi zańdy kúshine engen joq, — dep habarlady Aqtóbe qalasy № 2 sotynyń baspasóz qyzmeti. 

Buǵan deıin Aqtóbe oblysy Shalqar aýdandyq bilim bóliminiń basshysy qyzmetin asyra paıdalanǵany úshin sottalǵany jazyldy. Ol mektep dırektorynan aqsha jınatyp, jumsap jibergen.