Kúıeýin óltirgen aqtóbelik sot aldynda jaýap berip jatyr
AQTÓBE. KAZINFORM – Sotta aıyptaý aktisi oqyldy. Áıel kúıeýimen janjandasyp, birneshe ret pyshaq suǵyp alǵan.
Aqtóbe oblystyq qylmystyq ister jónindegi mamandandyrylǵan aýdanaralyq sotynda Ksenııa Sedovaǵa qatysty is qaralyp jatyr. Іs materıalyna súıensek, 2025 jyldyń sáýir aıynda sottalýshy jumystan soń úıine kelgende kúıeýiniń ishimdik iship otyrǵanyn kóredi. Sol kezde ekeýi ózara sózge kelip, janjal týady. Arada taǵy bir jarym saǵat ótkende jábirlenýshi jazǵy úıde júrgen áıelin kelip qushaqtaıdy. Sol kezde onyń áreketin jaqtyrmaǵan sottalýshy ıterip jiberip, taǵy janaldasady.
- Sottalýshy jábirlenýshiniń mas ekenin, ózine qarsylyq kórsete almaıtynyn bilip, as úı pyshaǵyn alyp basy men qolyna jaraqat salady. Keıin oń jaq keýdesine, arqa tusyna pyshaq suǵyp alady. Sedov sol jerde qulap, esin jımastan kóz jumdy. Sot-medıtsınalyq saraptama qorytyndysyna súıensek, Sedov kóp qan joǵaltqannan mert bolǵan. Hımııalyq-toksıkologııalyq saraptama kezinde jábirlenýshi qanyndaǵy spırttiń mólsheri 4,58 promılldi qurady. Ksenııa Sedova Qylmystyq kodekstiń 99-baby 1-bóligi boıynsha qylmystyq quqyqbuzýshylyq jasady,- dedi prokýror Dına Baıjanova.
Sottalýshy K.Sedovanyń aıtýynsha, ekeýi osydan eki jyl buryn kóńil jarasyp, qosylady. Arada eki aı ótkennen keıin úıde jıi daý-janjal bolyp, únemi polıtsııa shaqyryp otyrǵan. Sol kúni de kúıeýi ony uryp-soqqan.
- Sol qaıǵyly oqıǵa bolǵan kezde men júkti edim. Men oǵan ózimniń júkti ekenimdi aıttym. Ol soǵan qaramastan urdy. Meni únemi uratyn. Murnymdy da syndyrdy. Biz meniń qyzym úsheýimiz turamyz. Ókinishke qaraı, osynyń bárin meniń qyzym da kórip turdy,- dedi sottalýshy.
Aıta keteıik, Aqtóbede 25 jyl otasqan áıelin pyshaqtaǵan adam bas bostandyǵynan aıyryldy. Sot otyrysynda jábirlenýshi keshirim berip, bas bostandyǵynan aıyrmaýdy surady.
