Kúıeýin óltirgen aqtóbelik áıel raqymshylyqqa iligip, bostandyqqa shyqty
AQTÓBE. KAZINFORM - Sot-medıtsınalyq saraptama kezinde sottalýshynyń affekt jaǵdaıynda bolǵany anyqtaldy. Prokýror isti Qylmystyq kodekstiń «Affekt jaǵdaıynda jasalǵan adam óltirý» babyna aýystyrdy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy Ksenııa Sedovaǵa úkim shyqty. Alǵashynda oǵan Qylmystyq kodekstiń 99-baby 1-bóligimen aıyp taǵyldy. Keıin prokýror ony Qylmystyq kodekstiń 101-baby 1-bóligine aýystyrdy. Sottalýshy sońǵy sózinde ózin jáne qyzyn qorǵaǵanyn aıtyp, ádil sheshim shyǵarýdy surady.
- Adam óltirý týraly oıym bolmady. Men tek ózimdi, óz balamdy qorǵadym,- dedi sottalýshy Ksenııa Sedova.
Sottalýshy sot zalynan bostandyqqa shyqty.
- Ksenııa Sedova Qylmystyq kodekstiń 101-baby 1-bóligimen aıypty dep tanylyp, 1 jyl 6 aıǵa bos bostandyǵynan aıyrý jazasy taǵaıyndalsyn. «Raqymshylyq týraly» Zańǵa sáıkes K.Sedova jazadan bosatylsyn. Sedova sot zalynan bosatylsyn. Jábirlenýshiniń azamattyq talap aryzy ishinara qanaǵattandyrylyp, 5 mln teńge moraldyq, 378 500 teńge materıaldyq shyǵyn jáne zańdy ókilge 754 325 teńge óndirilsin,- dedi sýdıa J. Seıtjaparov.
Úkim shyqqan soń sottalýshy ádildik ornaǵanyn aıtyp, alǵysyn jetkizdi.
- Qatty ýaıymdadym, qobaljydym. Soǵan qaramastan ádildik ornaǵanyna qýanyshtymyn. Bizdiń sot ádil. Úmitim sońyna deıin úzilmedi. Ne bolady, qalaı bolady dep oıladym. Sot arqyly ádildikke jetýge bolatynyn túsindim. Men jazda úsh aı qamaýda otyrdym. Keıin aıyptaýda babyn ózgertip, raqymshylyqqa iliktim. Arada eki aı ótkende qaıtadan kisi ólimimen kúdikke iligip, qamaýǵa aldy. Sóıtip 10-qazannan bastap búginge deıin qamaýda boldym,-dedi sottalýshy Ksenııa Sedova.
Eske salsaq, 2025 jyldyń sáýir aıynda sottalýshy jumystan soń úıine kelgende kúıeýiniń ishimdik iship otyrǵanyn kóredi. Sol kezde ekeýi ózara sózge kelip, janjal týady. Arada taǵy bir jarym saǵat ótkende jábirlenýshi jazǵy úıde júrgen áıelin kelip qushaqtaıdy. Sol kezde onyń áreketin jaqtyrmaǵan sottalýshy ıterip jiberip, taǵy janaldasady. Keıin oń jaq keýdesine, arqasyna pyshaq suǵyp alady.