Kúıeýinen zábir kórgen 100 myńnan astam áıel polıtsııaǵa habarlasty - Marat Ahmetjanov

ÓSKEMEN. QazAqparat – Bıylǵy 9 aıda kúıeýinen zábir kórgen 100 myńnan astam áıel polıtsııaǵa qońyraý shaldy. Bul týraly QR Іshki ister mınıstri Marat Ahmetjanov Shyǵys Qazaqstan oblysynyń turǵyndarymen eseptik kezdesýde aıtty, dep habarlaıdy QazAqparat tilshisi.

QR Іshki ister mınıstri Marat Ahmetjanov turmystyq zorlyq-zombylyqqa tosqaýyl qoıý úshin qandaı sharalar atqarylyp jatqanyn jetkizdi.

«Turmystyq zorlyq-zombylyq – halyqty tolǵandyryp otyrǵan eń negizgi máselelerdiń biri. Osy týraly Memleket basshysy Joldaýynda da aıtyp, bizge naqty tapsyrmalar berdi. Pandemııa kezinde úıdegi osyndaı faktiler odan saıyn kóbeıip ketken bolatyn. Keıbir belsendiler bul quqyq buzýshylyqty qylmys sanatyna jatqyzý kerektigin aıtyp jatyr. Biraq ótkenge kóz júgirtsek, buǵan deıin qylmys qataryna qosqan kezimiz boldy. Keıin qaıtadan quqyq buzýshylyq sanatyna aýystyrǵan edik. Sondyqtan máseleni sheshýdiń basqa jolyn qarastyrǵan jón», - dedi vedomstvo basshysy.

Mınıstrdiń aıtýynsha, qazir turmystyq zorlyq-zombylyqty barynsha azaıtýǵa den qoıylýda. Degenmen birqatar kedergi bar. Osy jyldyń 9 aıynda Qazaqstanda «102» arnasyna úıde kúıeýinen zábir kórip jatqanyn aıtyp 100 myńnan astam áıel habarlasqan.

«Polıtsııa qyzmetkerleri birden oqıǵa oryndaryna bardy. Alaıda áıelderdiń 62 paıyzy jubaıynyń ústinen aryz jazýdan bas tartqan. Sonyń saldarynan saqshylar tek túsindirý jumystaryn júrgizip, eshqandaı shara qoldana almady. Arnaıy taldaý júrgize kele, biz birqatar sheshimge keldik. Aryzsyz-aq jaýapqa tartý quqyǵyn engizý kerek. ıAǵnı, eger áıelin uryp-soqqan fakti anyqtalsa, onda kúıeýin zań sheńberinde jazalaý qajet. Al eger burynǵydaı bola berse, ózin jazasyz sezingen erkek kúsh kórsetýin doǵarmaıdy», - dedi Marat Ahmetjanov.