«Kúıeýińdi túrmeden shyǵaramyn»: Semeı turǵyny alaıaqqa 12 mln teńge bergen

SEMEI. QazAqparat – Semeı qalasynda alaıaqqa aldanǵan áıel 12 mln teńgeden astam aqshasynan aıyryldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, polıtsııaǵa 37 jastaǵy áıel habarlasqan. Onyń aıtýynsha, ózin áńgimege tartqan belgisiz bireý Óskemendegi túzetý mekemesinde jazasyn ótep jatqan jubaıyn merziminen buryn bosap shyǵýyna kómektese alatyndyǵyn jetkizdi.

«Belgili bolǵandaı, alaıaq buǵan deıin jábirlenýshiniń kúıeýimen bir túrmede otyrǵan. Bostandyqqa shyqqan soń ońaı oljaǵa kenelý úshin osyndaı qadamǵa bardy. Aldanyp qalǵan áıel onyń qolyna 12 580 000 teńge ustatqan. Alaıda keıinnen jubaıy kolonııadan shyǵarylmaǵannan keıin alaıaqtyń arbaýyna ilikkenin túsindi», - delingen aqparatta.

Qazirgi ýaqytta atalǵan fakti boıynsha QR Qylmystyq Kodeksiniń 190-baby 4-bóligine sáıkes sotqa deıingi tergeý amaldary júrgizilýde.