Kúıeýin pyshaqtap tastaǵan: ShQO-da 25 jastaǵy áıel ustaldy

ÓSKEMEN. QazAqparat – Shyǵys Qazaqstan oblysy Altaı aýdanynda kúıeýin pyshaqtaǵan áıel ustaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, keshki ýaqytta qonaqqa barǵan erli-zaıyptynyń arasynda janjal shyqqan. Anyqtalǵandaı, ekeýi de otyrys kezinde alkogoldi ishimdik ishken.

Sol kezde áıel adam qolyna pyshaq alyp kúıeýiniń sol jaq keýdesine suǵyp jiberdi. Shuǵyl túrde Altaı aýdandyq aýrýhanasyna jetkizilgen 35 jastaǵy erkek aman qalǵan.

«Polıtsııa qyzmetkerleri 25 jastaǵy áıeldi kóp uzamaı ustady. Jaýap alý barysynda ol óz kinásin tolyqtaı moıyndaǵan. Qazirgi ýaqytta kúdiktige qatysty QR QK-niń 106-baby 1-bóligine (densaýlyqqa qasaqana aýyr zııan keltirý) sáıkes sotqa deıingi tergeý amaldary júrgizilýde», - dedi departament bastyǵy Saǵat Mádıev.