Kúıeýi soqqyǵa jyqqan Mańǵystaý turǵyny jarty jyldan beri komada jatyr
AQTAÝ. QazAqparat - Aqtaý qalalyq soty QR QK 106-babynyń 1-tarmaǵy, densaýlyqqa qasaqana aýyr zııan keltirý boıynsha qylmystyq isti qarady. Sottalýshy ótken jyldyń jaz mezgilinde óziniń jubaıyn uryp-soǵyp, 5 jylǵa bas bostandyǵynan aıyryldy.
Áıel jedel túrde aýdandyq aýrýhananyń jan saqtaý bólimine jetkizilip, keıinnen Astana qalalyq jan saqtaý bólimine aýystyrylǵan. Ol qazirge deıin es-tússiz komada jatyr, dep habarlaıdy «QazAqparat» HAA tilshisi.
«Basty sot qaralymynda anyqtalǵandaı, M. jubaıy satýshy bolyp jumys jasaıtyn Baýtıno aýylyndaǵy (Mańǵystaý oblysy Túpqaraǵan aýdany) dúkenge keledi. Aralarynda urys bolyp, ol áıeline birneshe ret qol kóteredi. Denesindegi aýyr jaraqat saldarynan, esinen tanyp, edenge qulaıdy. Sottalýshy óziniń qylmystyq is-áreketterin jasyrý maqsatynda dúkende ornatylǵan kameranyń beıne túsirilimdi saqtaý blogyn jasyryp tastaǵan. Keıin jedel járdem shaqyrady. Barlyq oqıǵa túsirilgen beınebaqylaý kamerasynyń blogy tabylmady, alaıdy kúıeýiniń aıypty ekeni dáleldendi.
Aıta keteıik, tutqyndalýshy apellıatsııalyq shaǵym túsirdi, is qylmystyq sotta qaralyp, úkim ózgerissiz qaldy. Sottalýshy 5 jylǵa bas bostandyǵyn aıyryldy, úkim zańdy kúshine endi», - dep atap ótti Mańǵystaý oblystyq baspasóz qyzmetiniń ókili Gaýhar Nurhanova.
Sottalýshy óz kinásin moıyndamady. Erli-zaıyptylardyń eki balasy bar, olar qazir jábirlenýshiniń ákesimen turyp jatyr.
