«Kúıdirginiń» adamdarǵa juǵýyna aýrý maldyń arnaıy qasapqanalarda baýyzdalmaýy alyp keldi - AShM

Eske sala keteıik, atalmysh jaǵdaı 2010 jylǵy maýsymnyń 14-i kúni Aqsý aýdanyna qarasty Jolqudyq aýyldyq okrýginde oryn aldy.

«Oblystyń bas veterınarlyq ınspektory men jergilikti atqarý organdary mal aýrýynyń adamdarǵa juǵýynyń negizgi sebebi retinde «maldyń der kezinde egilmeýi» dep jasaǵan asyǵys málimdemeleri, jan-jaqty júrgizilgen taldaý nátıjesinde rastalmady», delingen AShM-nyń baspasóz habarlamasynda.

Sonymen qatar mınıstrlikten atap kórsetkendeı, birinshiden, atqarylǵan jumys aktisine sáıkes sibir jarasyna qarsy 2009 jyly kezeń-kezeńmen naýryzdyń 28-i kúni, mamyrdyń 5-i jáne maýsymnyń 6-y kúnderi osy aýyldyq okrýgtegi barlyq mal egilgen. Sibir jarasy vaktsınasyn qoldaný nusqaýlyǵyna sáıkes, vaktsına egilgen malda ımmýndyq fon 18 aıǵa deıin saqtalady. Sol sebepti atalǵan aýyldyq okrýgte mal jappaı aýyrmaı, bir bas maldyń aýrýy shartty jaǵdaı retinde, ár mal basynyń jeke dara ereksheligine nemese vaktsına egý kezinde jibergen kemshilikterge baılanysty kezdesedi.

Ekinshiden, jergilikti atqarý organdarynyń mindetine jatatyn jekeshelendirý (ıdentıfıkatsııalaý) sharasynyń joqtyǵynan aýyrǵan maldyń byltyrǵy naýryzda egilgen-egilmegenin anyqtaý múmkin bolmaı otyr.

Úshinshiden, satýǵa arnalǵan maldyń jeke aýlada soıylýyna jol berilgen. «Veterınarııa týraly» Zańǵa sáıkes mal soıý veterınardyń qadaǵalaýmen arnaıy qasapqanalarda nemese mal soıý alańdarynda júrgizilýi tıis. 2010 jylǵy naýryzdyń 2-sindegi № 161 Úkimet qaýlysyna sáıkes, jergilikti atqarý organdary qasapqanalardy 2010 jylǵy maýsymnyń 1-ine deıin salyp bitirýi tıis bolatyn. Al Pavlodar oblysynyń ákimdigi men Aýyl sharýashylyǵy mınıstrligi arasyndaǵy 2010 jylǵy kańtardyń 21-indegi kelisimge sáıkes osy aýyldyq okrýgte bir qasapqana salyp, ony iske qosý josparlanǵan. Alaıda bul shara oryndalmaı qalyp otyr.

«Osy sebepti aýrý mal jeke aýlada maldárigerdiń qadaǵalanýynsyz soıylyp, adamdarǵa aýrý juǵýyna ákelip soqtyrdy», delingen baspaóz mátininde.