«Kúı kúmbiri» aktsııasy aıasynda 1 mıllıon oqýshy kúı tartady

ASTANA. KAZINFORM – 20 naýryz kúni «Kúı kúmbiri» aktsııasy aıasynda 1 mln oqýshy men pedagog kúı tartady. Bul týraly Ortalyq kommýnıkatsııalar qyzmetindegi brıfıngide Oqý-aǵartý mınıstrligi Tárbıe jumysy jáne qosymsha bilim berý departamentiniń dırektory Erlan Qalmaqov aıtty. 

— Qazirgi tańda bilim berý uıymdarynda «Naýryznama» tujyrymdamasyna sáıkes túrli sharalar uıymdastyrylyp jatyr. Solardyń biri — dástúrge aınalyp úlgergen «Kúı kúmbiri» aktsııasy. 20 naýryz kúni saǵat 11-de barlyq mektepte bir ýaqytta kúı oınalady. Oǵan 1 mln-ǵa deıin oqýshy men pedagog qatysady dep kútilýde, - dedi departament basshysy.

Sonymen qatar ol «Balalar kitaphanasy» bilim alýshylardyń oqý saýattylyǵy men oqyrmandyq mádenıetin órkendetip, rýhanı kemeldikke bastaıtynyn atap ótti. Onyń aıasynda jas oqyrmandarǵa usynylatyn 2 580 kitap iriktelip, tizimi bekitilgenin aıtty. 

— Qazirgi ýaqytta osy tizimge saı kitaphana qory tolyqtyrylýda. Baǵdarlama aıasynda mektep kitaphanasynyń qoryn jyl saıyn 2 mln danaǵa ulǵaıtý kózdelip otyr. Byltyrdan bastap balalar kitaphanasy portaly iske qosyldy. 2025 jyly aqpan aıynda atalǵan joba aıasynda «Shyn júrekten kitap syıla» chellendjine 700 myńnan asa bilim alýshy qatysyp, bir-birine kitap syılady. Bul bastama oqyrmandyq mádenıetti damytýǵa, bilim alýshylar arasynda kitap oqýǵa degen qyzyǵýshylyqty arttyrýǵa oń yqpal etedi, - dedi Erlan Qalmaqov.

Buǵan deıin Prezıdent mektepterge engiziletin «Adal azamat» baǵdarlamasyn qoldaǵanyn jazǵan edik.