Kýveıtten Túrkistanǵa turaqty avıareıs iske qosylady

ASTANA. QazAqparat – Bıylǵy 3 jeltoqsannan bastap «Kýveıt – Túrkistan» baǵytynda turaqty áýe reısi qatynaı bastaıdy. Bul týraly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat.

«Qazaqstan Respýblıkasy men Kýveıt memleketiniń avıatsııalyq bıligi arasynda qol jetkizilgen ýaǵdalastyqtar negizinde «Jazeera Airways» Kýveıt loýkosteri aǵymdaǵy jyldyń 3 jeltoqsanynan bastap «Kýveıt – Túrkistan baǵytynda» ushýlardy oryndaı bastaıdy.

Kýveıt astanasy men túrki áleminiń rýhanı ortalyǵy arasyndaǵy turaqty jolaýshylar reısteri seısenbi jáne jeksenbi kúnderi Airbus A-320 tıpti áýe kemesinde aptasyna 2 reıs jıiligimen oryndalatyn bolady.

Reıster sanynyń ulǵaıýy jáne ushý geografııasynyń keńeıýi Qazaqstan men Kýveıt arasyndaǵy saýda-ekonomıkalyq, iskerlik, ınvestıtsııalyq, mádenı jáne týrıstik ózara qarym-qatynastardyń odan ári damýyna yqpal etpek», - delingen málismette.