Kýveıtte merziminen buryn parlament saılaýy ótti
ÁBÝ-DABI. QazAqparat - Kýveıtte merziminen buryn bolǵan Ulttyq jınalys (parlament) saılaýy aıaqtaldy, dep habarlaıdy óńirdegi QazAqparat tilshisi.
Bıyl 16 qazanda Kýveıt ámiri sheıh Sabah al Ahmed As-Sabah bıliktiń atqarýshy jáne zań shyǵarýshy salalarynyń janjalyna baılanysty parlamentti taratý týraly dekret jarııalady.
Eldegi daǵdarys Kýveıt bıligin Parlament kelisiminsiz janarmaı baǵasyn kóterý týraly sheshim qabyldaýǵa májbúr etti. Munaı baǵasynyń arzandaýynan Kýveıt alǵash ret bıýdjet tapshylyǵyn sezindi. Osyǵan baılanysty bılik memlekettik qazynany toltyrýdyń barlyq joldaryn qarastyrýda. Eldegi kezekti parlament saılaýy 2017 jyldyń shilde-tamyz aılarynda ótýi tıis edi. 2013 jyly tórt jylǵa saılanǵan Ulttyq jınalys ókilettiliginiń merzimi 2017 jyly aıaqtalady.
Aldyn ala boljam boıynsha, saılaýǵa halyqtyń 70-80% qatysqan. Kýveıt bes okrýgke bólingen, parlamenttegi 50 orynǵa olardyń árqaısysynan 10 ókilden saılanady. 15-shaqyrylym parlamentine úmitkerlerdiń jalpy sany 293, olardyń 14-i áıel.
