Kýveıt QR-dyń halyqaralyq qoǵamdastyqtyń bir múshesi bolýyn quptaǵan elderdiń biri - Elshi
ASTANA. QazAqparat - Astanada Kýveıt Respýblıkasynyń Ulttyq kúniniń 56 jyldyǵyna jáne Azattyq kúniniń 26 jyldyǵyna arnalǵan resmı qabyldaý ótti.
QR-daǵy Kýveıttiń Tótenshe jáne Ókiletti Elshisi Tarek Abdýlla Al-Faradj aldymen, Qazaq elin Táýelsizdiktiń 25 jyldyq mereıtoıymen quttyqtady. «Osyndaı qysqa ýaqyt aralyǵynda Qazaqstan Respýblıkasy orasan kóp kezeńderden ótip, álemdik jáne aımaqtyq erekshe orny bar memleketke, sondaı-aq halyqaralyq jáne aımaqtyq máselelerdi sheshýde arqa súıeıtin mekenge aınaldy. Munyń barlyǵy osy eldiń saıası bıliginiń danalyǵy men qonaqjaı halqynyń keńshiliginen dep bilemin. Sonymen qatar, Qazaqstan Respýblıkasyn BUU Qaýipsizdik Keńesiniń turaqty emes múshesi bolýymen quttyqtaımyn», - dep atap ótti ol.
Kýveıt Elshisi óz eliniń tarıhy men ekonomıkasy, álemdegi orny jóninde baıandaı kele, Qazaqstan men Kýveıt arasyndaǵy qarym-qatynastarǵa toqtaldy.
«Kýveıt-Qazaqstan qarym-qatynastary QR egemendigin alǵan ýaqyttan beri bastaldy. Kýveıt Qazaqstannyń halyqaralyq qoǵamdastyqtyń bir múshesi bolýyn qoshtap, quptaǵan elderdiń biri bolyp tabylady. Kýveıt-Qazaqstan qarym-qatynastary áýel bastan damydy, 1997 jylǵy Elbasy Nursultan Nazarbaev myrza Kýveıt memleketine resmı sapar jasap, nátıjesinde birneshe ekijaqty kelisimderge qol qoıylyp, Qazaqstan-Kýveıt saýda-ekonomıkalyq jáne mádenı-gýmanıtarlyq Úkimetaralyq komıssııasy quryldy. Komıssııanyń birneshe otyrysy ótip, eki el arasyndaǵy kelisimderge qol qoıyldy», - dedi dıplomat.
