Kýveıt kınogerleri Ózbekstanda «Mámlúkter tarıhy» atty fılm túsirmek
TAShKENT. KAZINFORM - Ferǵana oblysy men Qoqan qalasynyń ákimdigi kýveıttik «Ebla International» kompanııasynyń basshysy Hılal Arnaýt bastaǵan delegatsııany qabyldady, dep habarlaıdy ÓzA.
Taraptar 30 bólimnen turatyn «Mámlúkter tarıhy» fılminiń keıbir bólimderin Qoqan qalasynda túsirý máselesin talqylady. Kezdesýde Qoqannyń týrıstik áleýetin álemge tanytý jáne qalanyń tarıhı-mádenı baılyǵyn kórsetý múmkindikteri qarastyryldy. Munda túsiriletin «Mámlúkter tarıhy» fılminiń bir bólimi Qoqannyń ásem sáýletin, kóne eskertkishteri men mádenı murasyn álem jurtshylyǵyna tanystyrý úshin tamasha alań bolady dep josparlanǵan.
– Fılmniń Qoqanda túsirilýi qalanyń álemdik týrıstik kartadaǵy ornyn nyǵaıtýǵa septigin tıgizedi, – dedi oblys ákiminiń orynbasary Hýrshıdjon Ahmedov.
Óz kezeginde «Ebla International» kompanııasynyń basshysy Hılal Arnaýt óńirdiń tabıǵatyna nazar aýdardy.
– Biz Ferǵana oblysy aýmaǵyndaǵy tabıǵat, taýlar men ózenderdiń tarıhı eskertkishterimen úılesim taýyp, mámlúk dáýiriniń landshafttaryn qalpyna keltirýdiń qolaılylyǵyn baıqadyq. Sonymen qatar ekranda tartymdy keıipker jasaı alatyn jergilikti akterlerdi tartamyz, – dedi Hılal Arnaýt.
«Mámlıýkter tarıhy» fılminiń túsirilimi osy jazda bastalady.
Eske sala keteıik, TMD-nyń alǵashqy halyqaralyq kınofestıvali Qazaqstanda ótpek.