Kýveıt Qazaqstannyń munaı-gaz jobalaryna kóz tigip otyr
ASTANA. KAZINFORM — Qazaqstan men Kýveıt munaı-gaz salasyndaǵy ınvestıtsııalyq yntymaqtastyqty keńeıtýdi kózdep otyr. Taraptar Kýveıttiń KUFPEC kompanııasynyń Qazaqstandaǵy perspektıvaly jobalarǵa qatysý múmkindikterin talqylap, naqty jobalardy zerdeleý úshin beıindi tehnıkalyq komandalardyń onlaın-kezdesýin ótkizýge ýaǵdalasty. Bul týraly QR SІM baspasóz qyzmeti málim etti.
Qazaqstan Respýblıkasynyń Kýveıt Memleketindegi Elshisi Erjan Elekeev Kuwait Foreign Petroleum Exploration Company (KUFPEC) kompanııasynyń Bas atqarýshy dırektory Isa Ál-Maragımen kezdesý ótkizdi.
Kezdesý barysynda taraptar Qazaqstan men Kýveıt arasyndaǵy munaı-gaz salasyndaǵy yntymaqtastyqty keńeıtý perspektıvalaryn talqylap, Kýveıt tarapynyń Qazaqstandaǵy perspektıvaly jobalardy iske asyrýǵa qatysý múmkindikterine erekshe nazar aýdardy.
Mınıstrliktiń málimetinshe, Qazaqstan Elshisi suhbattasyn elimizdiń munaı-gaz salasynyń áleýeti, qolda bar ınvestıtsııalyq múmkindikter, sondaı-aq kómirsýtekterdi barlaý jáne óndirý salasyna halyqaralyq ınvestıtsııalar, ozyq tehnologııalar men tájirıbe tartýǵa Qazaqstan tarapynyń múddeliligi týraly habardar etken.
KUFPEC basshylyǵy Qazaqstannyń munaı-gaz sektoryndaǵy ınvestıtsııalyq múmkindikterdi zerdeleýge jáne naqty jobalarǵa qatysý perspektıvalaryn qarastyrýǵa múddelilik bildirdi.
— Taraptar ınvestıtsııalyq múmkindikterdi, tehnıkalyq parametrlerdi jáne munaı-gaz jobalaryn iske asyrýdyń yqtımal tetikterin egjeı-tegjeıli talqylaý maqsatynda Qazaqstan men KUFPEC-tiń beıindi tehnıkalyq komandalary arasynda onlaın-kezdesý ótkizýge ýaǵdalasty. Osy jumystyń nátıjeleri boıynsha jáne ózara qyzyǵýshylyq týdyratyn naqty jobalar aıqyndalǵan jaǵdaıda, taraptar praktıkalyq ózara is-qımyldy odan ári ilgeriletý maqsatynda ekijaqty oflaın kezdesýler ótkizý jáne delegatsııalar almasý múmkindigin qarastyrady, — delingen habarlamada.
Kezdesý qorytyndysy boıynsha taraptar tikeleı jumys dıalogyn qoldaýǵa jáne munaı-gaz salasyndaǵy yntymaqtastyqtyń naqty múmkindikterin qarastyrýǵa kezeń-kezeńimen kóshýge múddeliligin rastady.
Kuwait Foreign Petroleum Exploration Company (KUFPEC) — Kýveıttiń memlekettik Kuwait Petroleum Corporation (KPC) korporatsııasyna tolyqtaı tıesili jáne Kýveıtten tys jerlerde munaı men gazdy barlaý jáne óndirýge mamandanǵan halyqaralyq munaı-gaz kompanııasy. Kompanııa bes qurlyqtaǵy 8 elde qyzmetin júzege asyrady. 2024 jyly KUFPEC-tiń óndiris kólemi táýligine shamamen 76 myń barrel munaı ekvıvalentin qurady. 2026 jyly kompanııa Brazılııadaǵy Orca jáne Sul de Orca jobalaryndaǵy 20% úlesti satyp alý týraly kelisimge keldi. Orca resýrstary shamamen 370 mln barrelge baǵalanady, al jobalyq óndiristik qýaty táýligine 120 myń barrelge deıin munaı óndirýdi kózdeıdi.
Eske sala keteıik, buǵan deıin Qazaqstan Kýveıttiń jańa agroaımaǵynyń óndiristik bazasyna aınalýy múmkin ekenin jazdyq.
