Kýveıt Qazaqstanmen tikeleı áýe qatynasyn ashýdy usyndy
ASTANA. QazAqparat - Kýveıt tarapy Qazaqstanmen aradaǵy baılanysqa oń serpin beretin tikeleı áýe qatynasyn ashýdy usyndy. Bul týraly QR Syrtqy ister mınıstri Beıbit Atamqulovtyń Ábý-Dabıde ótken Islam Yntymaqtastyǵy uıymy (IYU) Syrtqy ister mınıstrleriniń 46-shy otyrysy aıasynda birneshe eldiń syrtqy ister mınıstrlerimen kelissózderi barysynda belgili boldy, dep habarlaıdy QazAqparat mınıstrliktiń baspasóz qyzmetine silteme jasap.
Mınıstr alǵash bolyp Kýveıt memleketi Premer-Mınıstriniń birinshi orynbasary - Syrtqy ister mınıstri sheıh Sabah ál-Haled As-Sabahpen kezdesti. Taraptar ekijaqty yntymaqtastyq máselelerin, atap aıtqanda saýda-ekonomıkalyq jáne ınvestıtsııalyq qatynastardy jandandyrýyn talqylady. Kýveıt tarapy Qazaqstan men Kýveıt arasyndaǵy týrızmdi damytýǵa yqpal etetin jáne eki el arasyndaǵy ekonomıkalyq, gýmanıtarlyq jáne mádenı baılanystarǵa oń serpin beretin tikeleı áýe qatynasyn ashýdy usyndy.
Sondaı-aq, Kýveıt mınıstri óz kezeginde Qazaqstanǵa BUU Qaýipsizdik keńesiniń turaqty emes múshesi retinde óz kúsh-jigeri úshin rızashylyǵyn bildirdi.
Kelesi Saýd Arabııasy Koroldiginiń Syrtqy ister mınıstri Adel ál-Djýbeırmen kezdesýde eki eldiń saýda-ekonomıkalyq yntymaqtastyǵy máseleleri sóz boldy. B. Atamqulov Saýd Arabııasy tarapynan bizdiń elmen ekonomıkalyq dıalogty belsendi damytýǵa baǵyttalǵan «Qazaqstan-Saýd Arabııasy» úılestirý keńesin qurý týraly usynysyn tolyq qoldaıtyndyǵyn bildirdi.
Sodan soń, BAÁ-niń Syrtqy ister jáne halyqaralyq yntymaqtastyq mınıstri sheıh Abdalla ben Zaıd Ál Nahaıanmen kelissóz júrgizildi. Kezdesý barysynda aldaǵy ekijaqty saparlar kestesi, saýda-ekonomıkalyq jáne ınvestıtsııalyq yntymaqtastyq perspektıvalary, onyń ishinde BAÁ kapıtaly tartylǵan jobalar talqylandy. Saýda-ekonomıkalyq yntymaqtastyq aýqymyn odan ári keńeıtý týraly ýaǵdalastyqqa qol jetkizildi.
Elimizdiń syrtqy ister vedomstvosynyń basshysy óz sózinde Qazaqstan men BAÁ ǵarysh salasynda ózara tıimdi yntymaqtastyqty damytý men ǵarysh keńistigin beıbit maqsatta zertteýde joǵary perspektıva bar ekenin atap ótti.
Aǵymdaǵy jyly Ámirlik «Baıqońyr» ǵarysh aılaǵynan halyqaralyq ǵarysh stansasyna óz ǵaryshkerin jiberýdi josparlap otyr.
Odan bólek, Iordanııa Hashımıt Koroldiginiń Syrtqy ister mınıstri Aıman as-Safadımen saýda-ekonomıkalyq yntymaqtastyqty nyǵaıtý máseleleri talqylandy. Qazaqstan men Iordanııa arasyndaǵy qalyptasqan saıası dıalogqa qaramastan, eki jaqty saýdanyń kólemi obektıvti sebeptermen yntymaqtastyqtyń qarqynyna sáıkes kelmeıdi. Osy rette ekijaqty yntymaqtastyq jol kartasyn ázirleý qajettiligi atap ótildi.
Mınıstrliktiń málimetine súıensek, bizdiń el Sırııadaǵy daǵdarysty sheshýge baǵyttalǵan barlyq halyqaralyq bastamalardy qoldaıdy. Sonymen qatar, kezdesý barysynda Iordanııanyń Sırııadaǵy qaqtyǵystyń sheshilýindegi aıryqsha róli men qosqan úlesin basa aıtyldy.
Jáne bir kezdesý Indonezııanyń Syrtqy ister mınıstri Retno Marsýdımen ótti. Kelissóz barysynda ekijaqty jáne kópjaqty formattaǵy máseleler talqylandy.B.Atamqulov ındonezııalyq tarapty 2019-2020 jyldarǵa BUU Qaýipsizdik Keńesiniń turaqty emes múshesi retinde saılanýymen quttyqtap, halyqaralyq beıbitshilik pen qaýipsizdikti qamtamasyz etý maqsatynda Qazaqstan men Indonezııa arasyndaǵy BUU sheńberindegi yntymaqtastyqty nyǵaıtýǵa senim bildirdi.
Sonymen qatar, ekijaqty kólik-logıstıkalyq yntymaqtastyqty jandandyrý qajettigi de áńgime boldy. Osy turǵyda elimizdiń mınıstri suhbattasyn ASEAN elderine Qazaqstannyń teńiz qaqpasy retinde qarastyrylatyn qytaılyq Lıanıýngan portyndaǵy otandyq termınaldyń múmkinshilikterimen tanystyrdy.
