Kýveıt ınvestıtsııalyq qory Qazaqstanda astyq óńdeý jobasyn qarjylandyrmaq

Kýveıt ınvestıtsııalyq qory Azııadaǵy ózara is-qımyl jáne senim sharalary keńesiniń iskerlik alqasy aıasynda Qazaqstanda astyq óńdeý jobasyn qarjylandyrmaqshy, dep habarlaıdy Kazinform agenttigi.

«Mal sharýashylyǵynda, astyq ósirý salasynda, kókónis taqyrybynda jobalar bar. Jalpy aýyl sharýashylyǵy salasynda túrli memleketterdiń túrli ınvestorlarymen baılanys bar. Ol jobalardyń bir bóligi astyq óńdeýmen baılanysty.

Bul jobalarǵa AÓSShK-ge kiretin elderdiń bári qatysyp jatyr deýge bolady. Tipti baqylaýshy elder de atsalysyp jatyr. Mysaly, Kýveıt qory (Kýveıt ınvestıtsııaly qory – red.), kýveıt bıznesi qarastyryp jatqan birneshe iri, salmaqty joba bar. Mysaly, astyq óńdeýmen baılanysty joba bar. Kýveıt qory 1,5-2 mlrd dollardaı bolatyn ınvestıtsııany qarap jatyr.

Birinshi qadam jasaldy – Aqmola oblysynda jer bólindi. Ázirge bıznes jobany atamaýdy ótinip otyr. Áıtpese qazirdiń ózinde iske asyp jatyr. Óıtkeni belgili bir tehnıkalyq názik máseleler, kommertsııalyq qupııa máselesi bar. Jalpy jobalardyń kóbi iske asyrý satysynda», - dedi «Atameken» UKP tóralqa tóraǵasy Raıymbek Batalov AÓSShK bıznes forýmynda.

Sondaı-aq, ol bıznes forým aıasynda qazir qolǵa alynǵan jobalar pysyqtalatynyn, basty qorytyndy da osy jobalarmen baılanysty ekenin aıtty. Al keıbir jobalardyń quny joǵary bolǵandyqtan AÓSShK aıasymen ǵana shektelmeıtinin eskertti.

«AÓSShK iskerlik alqasynyń aıasyndaǵy naqty jobalardyń quny 100 mln dollardan sál artyq. Bulardyń bári shynaıy jobalar ekenin aıtqym keledi. Árıne, biz 1 mlrd dollar kóleminde bolsa dep josparlaǵanbyz. Biraq naqty is júzinde talqylanyp, iske asyryla bastaǵan jobalardyń quny 100 mln dollardan sál asady», - dedi Raıymbek Batalov.