Kýveıt «Borat ánurany» oqıǵasy úshin keshirim surap, kinálilerdi jazalaıtynyn málimdedi

Jarystyń dırektory, bas hatshy Obaıd Ál Osaımıdiń resmı keshiriminde bul qatelik ádeıi jasalmaǵandyǵy aıtylyp, oqıǵa boıynsha shuǵyl shara qoldanǵany aıtylýda.

«Osy qatelikti jibergen adamdarǵa jaza qoldanyp, Klýbymyz ben federatsııadan shyǵarylatynyn habarlaımyz», - deıdi O. Ál Osaımı.

«Keshe osy qateligimizdi túzete otyryp, biz taǵy da barlyq qatysýshylarmen birge Sizderdiń Týlaryńyzdyń qurmetpen kóterilýi kezinde naǵyz ánurandaryńyzdy oınattyq. Biz bul ánurannyń qaı kózden alynǵandyǵyn anyqtadyq, protokol kompanııasy ony ınternetten alǵanyn habarlady. Árıne, bolǵan qatelik úshin ókine otyryp, Sizderdiń federatsııalaryńyzǵa, sportshylaryńyz ben tamasha elderińizge degen qurmetimizdi kórsetetin bolamyz», - delingen hatta.

Atalmysh hatqa qatysty óz oıyn búgin Astanada QR Sport jáne dene shynyqtyrý isteri agenttigi basshysynyń orynbasary Elsııar Qanaǵatov bildirdi.

«Kýveııttiń uıymdastyrý komıteti málimdegenindeı, marapattaý rásimi men basqa da protokoldyq is-sharalardy júrgizý úshin arnaıy kompanııa tartylǵan. Sol kompanııanyń kemshiligi dep bizge aqparat berip otyr. Osy máselege renish bildirip jáne naqty jaýap berýlerin surap, biz, agenttik tarapynan Kýveıttiń Sport mınıstrligine arnaıy hat joldadyq. QR Syrtqy ister mınıstrligi tarapynan da osyndaı nota jiberildi», - dedi E. Qanaǵatov.

Onyń aıtýynsha, ánurannyń durystyǵyn teksermegen qazaqstandyq ókilderden áli eshkim jazalanǵan joq. «Kýveıt tarabynyń bizdiń hatqa qatysty jaýaby kelgennen soń, bul suraq taǵy da qaralady. Biraq bul tolyǵymen uıymdastyrý komıtetiniń kinási», - dep atap kórsetti E. Qanaǵatov.

«Biz Kýveıt tarapynan resmı keshirimdi kútip otyrmyz, sonyń ishinde sol eldiń Sport mınıstrliginen», - dep naqtylady ol.