Kýveıt ámirshisi ózine til tıgizgenderge Ramazannyń qurmetine keshirim jasady
ASTANA. 2 tamyz. QazAqparat - Kýveıt ámirshisi sheıh Sabah ál-Ahmet ál-Jaber as-Sabah ózine til tıgizgen adamǵa raqymshylyq etý týraly qujatqa qol qoıdy.
Seısenbide Ramazan aıynyń sońǵy on kúndigine oraı sóılegen sózinde ol qasıetti aıdyń qurmeti úshin osyndaı qadamǵa barǵanyn jetkizdi.
Búgingi tańda oppozıtsııa ókilderiniń kóbisi temir tordyń ar jaǵynda otyr. Olardyń on shaqtysy ámirshige til tıgizgeni úshin qamalǵan. Bir qyzyǵy, abaqtyǵa osyndaı sebeppen jabylǵandardyń arasynda eki áıel bar. Olardyń bireýi 11 jylǵa bas bostandyǵynan aıyrylsa, ekinshisi 20 aı túrmede otyrý jazasyna kesilgen bolatyn. Ázirge olar túrmeden shyǵa qoıǵan joq.
Sondaı-aq, áli aqyl toqtata qoımaǵan úsh jas belsendi de ámirshige til tıgizgeni úshin temir tordyń ar jaǵynda jatyr. Oppozıtsııa ókilderiniń bárine birdeı raqymshylyq jarııalana ma, álde bul abaqtyǵa jabylǵandarǵa ǵana qatysty ma, ol jaǵy ázirge belgisiz.
Muslim.kz saıtynyń jazýynsha, adam quqyǵyn qorǵaýshylardyń sózine qaraǵanda, ámirshige qarsy áreket etkenderdiń bári birdeı raqymshylyqqa ilige qoımaıdy. Adam quqyǵy jónindegi kýveıttik qoǵamnyń dırektory Muhammed Hýmeıdı «Tvıtter» áleýmettik jelisindegi óziniń paraqshasynda Joǵarǵy satydaǵy sottardyń nemese Joǵarǵy sottyń ókimimen jazaǵa kesilgender ǵana raqymshylyqqa iligetinin jazypty.
Ámirshi óz sózinde kórshiles elderdegi jaǵdaıdy eskere otyryp, onyń aldyn-alýǵa qamdanatynyn tilge tıek etti.
