QUTZÝ ýnıversıteti stýdentiniń ólimi jazataıym oqıǵa - Tahır Balyqbaev
ASTANA. QazAqparat - Q.Sátbaev atyndaǵy Qazaq ulttyq tehnıkalyq zertteý ýnıversıteti stýdentiniń ólimi jazataıym oqıǵa. Bul týraly búgin QR Memlekettik hatshysy Gúlshara Ábdiqalyqovanyń tóraǵalyǵymen ótken Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysy aıasynda BAQ ókilderine Bilim jáne ǵylym vıtse-mınıstri Tahır Balyqbaev aıtty.
«Biz qazirgi ýaqytta anyqtaýdamyz. Ol jerde jazataıym oqıǵa oryn alǵan. Stýdentter tóbelesip, ókinishke oraı 1 stýdent qaza tapty. Qazirgi ýaqytta ýnıversıtet basshylyǵy mán-jaıdy tolyǵymen anyqtaýda. Tergeý amaldary júrgizilýde. Mán-jaı tolyq belgili bolǵannan keıin habarlaıtyn bolamyz», - dedi T.Balyqbaev.
Sonymen qatar vıtse-mınıstr BAQ ókilderiniń joǵary oqý orny basshysyna qatysty qandaı da bir shara qoldanyla ma degen saýaldaryna da jaýap berdi.
«Árıne, joq. Bul jedel is-qımyl emes qoı. Mán-jaı tolyq anyqtalǵannan keıin qandaı shara qabyldaıtyndyǵymyzdy sheshemiz», - dedi ol.
Aıta keteıik, 30 qarasha kúni Q.Sátbaev atyndaǵy Qazaq ulttyq tehnıkalyq zertteý ýnıversıtetiniń bas korpýsynda 4 kýrstyń eki stýdenti arasynda janjal oryn alǵan. Urys-keris barysynda bir stýdent ekinshi stýdentke pyshaq salyp, sonyń saldarynan jábirlenýshi oqıǵa ornynda jantásilim etken.
