Kútýge ýaqytymyz da, quqyǵymyz da joq – maman koronavırýsqa qarsy vaktsınatsııa jaıly

NUR-SULTAN. QazAqparat – Spýtnık V vaktsınasymen qatar Qazaqstannyń Qaz Covid-in vaktsınasy da daıyn bolyp qaldy. Endeshe shetelden satyp almaı, nelikten otandyq vaktsınany halyqqa sala bermedik? Búgingi onlaın konferentsııa barysynda tilshilerdiń biriniń osyndaı suraǵyna QR DSM Sanıtarııalyq-epıdemıologııalyq baqylaý komıtetiniń vaktsınaǵa kónetin ınfektsııalardy baqylaý basqarmasynyń basshysy Nurshaı Ázimbaeva jaýap berdi, dep habarlaıdy QazAqparat tilshisi.

«Kútýge quqyǵymyz da, ýaqytymyz da joq. Sebebi kún saıyn elimizde qansha adamnyń koronavırýsty juqtyryp jatqanyn kórip otyrsyzdar. Ótken jyldyń qarasha aıynan beri indet qaıtadan údedi. Sondyqtan jaǵdaıdyń ózi bizge basqa amal qaldyratyn emes. Halyq jappaı aýyryp bolǵanyn kúte almaımyz. Óıtkeni ınfektsııany toqtatpaýdyń saldary aýyr. Búkil álem vaktsınalaýdy bastap ketti. Úkimet qoljetimdi amaldardyń bárin jasap jatyr. Qaz Covid-in vaktsınasy daıyn bolmaı turyp-aq halyqtyń osal kontınggentin basqa vaktsınamen saqtaýǵa múmkindik bar», - dedi Nurshaı Ázimbaeva.

Aıta ketsek, buǵan deıin Nurshaı Ázimbaeva Qaz Covid-in ekpesiniń «Spýtnık V» vaktsınasynan aıyrmashylyǵy qandaı ekenin túsindirip bergen bolatyn.