«Qutty meken» jobasy 7,5 mln aýyl halqynyń jaǵdaıyn jaqsartýǵa múmkindik beredi
«Nur Otan» partııasy elimizdegi ınjenerlik-áleýmettik ınfraqurylymdy damytýǵa baǵyttalǵan «Qutty meken» partııalyq jobasyn iske qosýy kerek. Osylaısha 7,5 mln aýyl turǵyndarynyń jaǵdaıyn jaqsartý múmkindigi týady. Eń aldymen úkimet ákimdermen jáne máslıhattarmen birigip, keleshegi bar aýyldardy iriktep, áleýmettik nysandar men ınternattar turǵyzý jumystaryn júrgizýi kerek», - dedi Prezıdent Astanada «Nur Otan» partııasynyń kezekti XVIII sezinde.
Elbasy Ahmetjan Esimovtiń Aýyl sharýashylyǵy mınıstri bolǵan jyldary júrgizilgen tájirıbeni eske saldy.
«7 myńnan astam aýyldy úsh topqa bólip qarastyrdyq. Halyq sany kóp, ortalyqtaǵy aýyldardy ári qaraı damytyp, jaǵdaıy ortasha aýyldarǵa kómektesý kerek. Sosyn kishigirim aýyldar bar. 10-20 úıi bar aýyldarǵa aýrýhana, mektep salýdyń qajeti joq. Sondyqtan, aýdan ortalyqtarynyń ınfraqurylymyn jaqsartý kezinde birden ınternattar turǵyzý kerek. Sebebi balalar sapaly bilim, sapaly medıtsınasy bar jerde ósýi tıis. Aýyldarmen osyndaı tásil arqyly jumys isteýi qajet», - dep tolyqtyrdy sózin N. Nazarbaev.
Aıta keteıik, Elordadaǵy Táýelsizdik saraıynda Elbasy Nursultan Nazarbaevtyń tóraǵalyǵymen «Nur Otan» partııasynyń kezekti XVIII sezi ótip jatyr.
Sezd «Nur Otan» partııasynyń 20 jyldyǵyna oraı uıymdastyrylyp otyr. Onda birneshe máseleni qarastyrý kózdelgen.
Eń aldymen «Nur Otan» partııasynyń 2030 jylǵa deıingi baǵdarlamasy týraly másele qozǵalady. Odan keıin partııanyń Jarǵysyna ózgerister men tolyqtyrýlar qarastyrylyp, partııa Saıası keńesiniń jəne Ortalyq baqylaý-tekserý komıssııasynyń esepti kezeń boıynsha jumysynyń qorytyndylary shyǵarylady. Sonymen qatar partııa Saıası keńesiniń jəne Ortalyq baqylaý-tekserý komıssııasynyń músheleri saılanatyn bolady.
Sezd jumysyna 2 myńǵa jýyq adam qatysýda. Olardyń 1200-i - elimizdiń barlyq óńirlerinen kelgen delegattar, al qalǵan 800-ge jýyǵy - qonaqtar.
