Qutty meken: qandastardyń kóshi-qony biryńǵaı júıe arqyly esepke alynady

ASTANA. QazAqparat – 508 etıkalyq qazaq otbasy elimizdiń soltústigine kóshýge ruqsat aldy. Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Kóshi-qon aǵynyn esepke alý úshin kóship-qonýshylardyń 13 baǵytyn qamtıtyn «Qutty meken» biryńǵaı aqparattyq júıesin qurý jumystary iske asyrylyp jatyr. Bul shara memlekettik shekaradan ótken Qazaqstan jáne shetel azamattarynyń kelý maqsaty men turý merziminiń biryńǵaı esebin júrgizýge, «bir tereze» qaǵıdaty arqyly kóshi-qon úrdisteriniń baǵyty boıynsha memlekettik qyzmet kórsetýge múmkindik beredi», - dedi Úkimet basshysy jaýabynda.

Onyń atap ótýinshe, qazirgi ýaqytta «Qandas», «Sheteldik jumys kúshi», «Eńbek naryǵy» sııaqty avtomattandyrylǵan aqparattyq júıelerdiń arhıtektýralaryna taldaý jasalyp, «Qonys aýdarýshylardy óńirlik kvotaǵa qabyldaý» memlekettik qyzmetin kórsetý boıynsha jumystar júrgizilip jatyr.

«Sonymen qatar, etnıkalyq kóshi-qondy retteý boıynsha ádister qaıta qaraldy. Halyqaralyq tájirıbege súıene otyryp, shetelde turatyn etnıkalyq qazaqtardyń qandas mártebesin alýǵa ótinishin QR SІM sheteldegi mekemesi arqyly elimizdiń aýmaǵynda qandastardy «bir tereze» qaǵıdaty boıynsha ornalastyrýdyń jańa tetigi engizildi. Jańa tetik pılottyq rejımde birqatar elde iske asyryla bastady. Qazirgi ýaqytta, «bir tereze» qaǵıdaty boıynsha soltústik óńirlerge kóshirý úshin 1 937 (631 otbasy) etnıkalyq qazaqtyń ótinishi qabyldandy, onyń 1 559-y (508 otbasy) ruqsat aldy», - dedi Premer-Mınıstr.