Kútpegen tosynsyı: Semeılikterdiń Abaı oblysy qurylatynyn alǵash estigen sáti
Sondaǵy alǵashqy qatarda otyrǵan Qazaqstan Jazýshylar odaǵy Semeı qalalyq fılıalynyń tóraǵasy Mereı Qart QazAqparat tilshisine jan saraıyn jadyratqan jańalyqty estigendegi alǵashqy áserin bólisti.
«Abaı oblysynyń qurylýy bizge kútpegen tosynsyı boldy. Muqym qala jurtshylyǵy bórkimizdi aspanǵa atyp qýanyp jatyrmyz. Eń alǵash estigen sátte ózimdi qoıarǵa jer tappaı, tóbem kókke jetti. Memleket basshysy Qasym Jomart-Toqaev byltyr Abaıdyń 175 jyldyǵynda «Abaı uldarymen» atty eskertkishtiń ashylý rásimine qatysqan bolatyn. Sonda Prezıdent óz sózinde Semeıdiń tarıhı, mádenı statýsy bolý kerektigin aıtqan edi. Mine, búgin sonyń núktesi qoıylyp otyr», - dedi Mereı Qart.
Onyń aıtýynsha, Abaı, Shákárim men Muhtardy dúnıege ákelgen qasıetti jerdiń osyǵan deıin ekonomıkalyq-áleýmettik turǵyda jaǵdaıy nasharlap, halqynyń turmysy tómendep ketken.
«Semeılikter bul jańalyqty kópten kútti. Dese de ıgiliktiń erte-keshi joq. Endi qaıtadan shaharǵa jan bitip, tirshiligi qyj-qyj qaınaıdy dep senemin. Áleýmettik nysandar jóndeýden ótip, mádenı ortalyqtar ashylyp, jurttyń jaǵdaıy túzelse deımiz. Basqa oblystarmen terezemiz teń bolyp, mol qarajat bólinse quba-qup. Kósheler, joldar jóndelip, qordalanǵan basqa da máseleler sheshimin tapta degen tilektemiz», - dedi Qazaqstan Jazýshylar odaǵy Semeı qalalyq fılıalynyń tóraǵasy.
Óz sózinde ol Semeıdiń Batys óńirleri sekildi munaı emes, Qaraǵandy oblysy sııaqty kómir emes, adam kapıtalyn shyǵaryp otyrǵanyn jetkizdi.
«Keıbireýler Semeıde bolashaq joq, sondyqtan basqa jaqqa kóshý kerek degendi aıtyp júrdi. Meniń olarǵa aıtarym – kezinde Alash partııasy bolmasa qazir elorda men Almatyda júrgen jastardyń bolashaǵy bolmaıtyn edi», - dedi Mereı Qart.
