Qutlyq qaǵan bitiktasynyń tabylýy álem ǵylymyndaǵy mańyzdy oqıǵaǵa balanýda

ASTANA. QazAqparat - Halyqaralyq Túrki akademııasyna M.V.Lomonosov atyndaǵy Máskeý memlekettik ýnıversıteti janyndaǵy Azııa jáne Afrıka elderi ınstıtýtynan jýyrda Mońǵolııanyń Nomǵon alqabynda ashylǵan aıryqsha jańalyqqa qatysty quttyqtaý kelip tústi, dep habarlaıdy QazAqparat.

Túrki akademııasynan málim etkendeı, hatta Qutlyq qaǵan eskertkishiniń tabylýy «dúnıejúzi ǵylymynda mańyzdy oqıǵa sanalatyny» atap ótilgen Sonymen qatar, mundaı mańyzdy jańalyqtyń túrkologııanyń damýyna aıryqsha serpin beretini aıtylǵan.

«Sizderdi jeke ózimniń jáne M.V. Lomonosov atyndaǵy Máskeý memlekettik ýnıversıtetiniń Azııa jáne Afrıka elderi ınstıtýty ujymy atynan Mońǵolııanyń Arhanǵaı aımaǵynda Túrki akademııasynyń arheolog-mamandary ashqan aıryqsha mańyzdy ǵylymı jańalyǵymen shyn júrekten quttyqtaımyn. Tarıhta «túrk» ataýy alǵash ret kezdesetin eń kóne jazba eskertkishiniń tabylýy dúnıejúzi ǵylymynda mańyzdy oqıǵa bolyp sanalady jáne bul túrkologııanyń ǵylymı sala retinde damýyna sony serpin beredi. Sizge jáne sizdiń ujymǵa budan ári qaraı da shyǵarmashylyq tabys tileımin. Azııa jáne Afrıka elderi ınstıtýty men Túrki akademııasy arasynda aldaǵy ýaqytta tabysty áriptestik ornaıtynyna senemin», - delingen Akademııa prezıdenti Darhan Qydyráliniń atyna kelgen quttyqtaý hatta.

Eske salaıyq, bıyl Halyqaralyq Túrki akademııasy Mońǵolııanyń Arheologııa ınstıtýtymen birlesip uıymdastyrǵan ǵylymı ekspedıtsııasy nátıjesinde Nomǵon alqabynan kóne túrki dáýirine jatatyn bitiktastyń joǵarǵy bóligi men ǵuryptyq keshenin tapqan bolatyn. Ekspedıtsııa jumysyna akademııanyń ǵylymı qyzmetkerleri, belgili túrkolog Nápil Bazylhan men Nurbolat Bógenbaev qatysty. Túrki akademııasynyń ǵalymdary eskertkishke qashalǵan jazýlardy oqyp, onyń Ekinshi Túrki qaǵandyǵyn qurǵan Qutlyq qaǵanǵa arnalǵanyn anyqtap otyr.