Qutlyq Elteris qaǵannyń kesheni men jazýy álemdik ǵylymǵa qosylǵan tyń jańalyq - Qarın
«Qazaq ǵalymdary Darhan Qydyráli, Nápil Bazylhan, Nurbolat Bógenbaev mońǵolııalyq áriptesterimen birlesip Qutlyq Elteris qaǵannyń kesheni men jazýyn tapty. «Nomgon» birlesken ekspedıtsııasyn Halyqaralyq Túrki akademııasy men Mońǵolııa Ǵylym akademııasynyń Arheologııa ınstıtýty birlesip júrgizgen bolatyn.
Mamandar Nomgon keshenin Kúltegin men Bilge qaǵannyń ákesi, Túrik qaǵandyǵyn qaıta jańǵyrtýshy Qutlyq Elteris qaǵanǵa arnalǵan degen tujyrym jasap otyr. Sonymen qatar tabylǵan bitiktas «túrk» ataýy alǵash ret kezdesetin eń kóne túrki dáýiriniń jazba eskertkishi ekenin málim etti» dep jazdy Erlan Qarın.
Memlekettik keńesshi Qutlyq Elteris qaǵannyń kesheni men jazýy tabylýy álemdik ǵylymǵa qosylǵan tyń jańalyq ekenin atap ótti.
«Bul túrkologııa ǵylymyna ǵana emes, álemdik ǵylymǵa qosylǵan tyń jańalyq, zor úles. Búgin Darhan Qydyrálimen habarlasyp, qazaq ǵalymdarynyń tarıhı tabysymen quttyqtap, qýanyshqa ortaqtastyq. Ol jýyq arada baspasóz máslıhatyn ótkizip, bitiktastaǵy jazýlardyń syryn ashyp, jalpy jurtqa jarııalaıtyndaryn aıtty. Osylaısha, otandyq ǵalymdar kóne zamannyń kómbesin taýyp, ony álemdik aınalymǵa engizbek» dep túıdi sózin ol.
