Qutlyq Elteris qaǵan kesheninen «túrk» degen jazý tabyldy - Darhan Qydyráli

NUR-SULTAN. QazAqparat – Halyqaralyq túrki akademııasy Mońǵolııa astanasy Ulanbatyrda beınekonferentsııa arqyly baspasóz májilisin ótkizip, kórshi eldegi Nomǵon alqabynda júrgizgen ǵylymı-arheologııalyq ekspedıtsııanyń alǵashqy nátıjeleri týraly málimet usyndy, dep habarlaıdy QazAqparat tilshisi.

«Búgin sizdermen bizdiń jazý mádenıetimizdiń tarıhyn tereńdetetin, alǵash ret «túrk» degen sóz kezdesetin Kúltegin men Bilge qaǵannyń ákesi Qutlyq qaǵanǵa baılanysty úlken jańalyqty bóliskeli otyrmyz», - dep bastady Halyqaralyq túrki akademııasynyń prezıdenti Darhan Qydyráli.

Sondaı-aq, akademııa tarapynan Mońǵolııa jerindegi túrki murasyn izdestirý jumystary 2015 jyldan bastaý alatynyn, pandemııa kezinde saıabyr tartqan jumystar qaıta jandanǵanyn eske salyp ótti.

«Bul – úlken jańalyq. Kúltegin men Bilge qaǵannyń kesheni tabylǵan kez ben arada ótken ǵasyrǵa jýyq ýaqyttan bergi eń úlken jańalyqtyń biri dep esepteımiz jáne bizdiń tarıhymyzǵa zor úlesi bolatynyna eshqandaı daý joq. Bul – ekspedıtsııada tabylyp otyrǵan úlken olja», - dedi akademııa prezıdenti.

Aıta keteıik, Mońǵolııa jerindegi Nomǵon ekspedıtsııasy 2019 jyly bastalǵan. Pandemııadan keıin qaıta jandanǵan ekspedıtsııa bıyl qundy olja taýyp otyr. Kúltegin men Bilge qaǵannyń ákesi, Túrik qaǵandyǵyn qaıta jańǵyrtýshy uly Qutlyq Elteris qaǵannyń kesheni tabyldy.

Eske salsaq, keshe Túrik qaǵandyǵyn qaıta dáýirletken uly Qutlyq Elteris qaǵannyń kesheni tabylǵany habarlanǵan bolatyn.

Foto: facebook.com/darhan.hidirali