Qutlyq Elteris qaǵan kesheninen tabylǵan bitiktastiń ekinshi bóligi tanystyryldy
ASTANA. KAZINFORM – Ulanbatyr qalasynda Túrki Akademııasy jáne Mońǵolııa Ǵylym akademııasy Arheologııa ınstıtýty «Nomǵon-2» ǵuryptyq kesheninen tabylǵan bitiktastyń tómengi bóliginiń tanystyrylymyn jasady.
Arheologtar Qutlyq Elteris qaǵanǵa tıesili dep boljap otyrǵan bitiktastyń joǵarǵy bóligi aldyńǵy jyly osy keshendegi qazba jumystary kezinde tabylǵan bolatyn.
«Onyń ekinshi bóligin izdeýge qatysqan ǵalymdardyń málimdeýinshe, bitiktastyń jańadan tabylǵan tómengi bóliginde kóne qytaı tilinde mátin bary anyqtalǵan. Eskertkishtiń birshama búlingeni baıqalady. Ǵalymdar bitiktastaǵy jazýlardy oqyp, zertteý jumystaryn júrgizýde», - dep habarlady Túrki akademııasynyń baspasóz qyzmeti.
Osy alqapta Túrki Akademııasy júrgizgen arheologııalyq qazba jumystary barysynda 2019, 2022, 2023 jyldary maldas quryp otyrǵan qaǵannnyń bádiz tasmúsini men músinniń bas bóligi tabylǵan bolatyn. Sonymen qatar, baýyrynda eki alany beınelengen arystan tas músini jáne 5 bádiz tas músinniń synyq bólshekteri anyqtalǵan.
Túrki Akademııasy men Mońǵolııa Ǵylym akademııasy Arheologııa ınstıtýty bolashaqta Nomǵon jazyǵynda arheologııalyq qazba jumystaryn jalǵastyrýdy josparlap otyr.
Aıta keteıik, Shyńǵyshan murajaıynda ótken ǵylymı is-sharaǵa Túrki Akademııasynyń prezıdenti Shahın Mustafaev, Mońǵolııa Ǵylym akademııasynyń prezıdenti Dúgerıın Regdel, Qazaqstannyń Mońǵolııadaǵy elshisi Ǵabıt Qoıshybaev, Túrkııanyń Mońǵolııadaǵy elshiliginiń ýaqytsha senimdi ókili Alı Saıd Serdengechtı, dıplomatııalyq mıssııa ókilderi, ınstıtýttardyń basshylary jáne ózge de tanymal ǵalymdar qatysty.
Buǵan deıin KAZINFORM agenttigi Qutlyq Elteris qaǵan kesheni týraly tyń málimetterdi jarııalaǵan edi.
