Qutqarylǵan úkiniń balapanyna «Balaqaı» degen at qoıyldy
ASTANA. QazAqparat - Pavlodarlyq ormanshylar úkiniń balapanyn qutqardy, dep habarlaıdy pavlodarnews.kz.
«Ýsolka shaǵyn aýdanyndaǵy «Jeti aǵaıyn» meshitiniń mańynda qala turǵyndary úkiniń balapanyn taýyp alyp, bizge habarlasty. Qanaty qataımaǵan balapan uıadan qulap túsýi yqtımal. Biz ony Aqsý qalasyndaǵy jas natýralıster stansasynyń qaramaǵyna tapsyrdyq», - deıdi qalalyq orman jáne janýarlar álemin qorǵaý jónindegi memlekettik mekemesiniń dırektory Ajdar Júsipov.
Buǵan deıin segiz aı boıy birqazandy kútip, erkindikke jibergen jas natýralıster stansasynyń dırektory Jantoty Aqyshevanyń aıtýynsha, balapanǵa «Balaqaı» (Malysh) degen at berilgen.
«Balapan kúnine 200 gramm taza et jeıdi. Onyń jaǵdaıy jaqsaryp qaldy», - deıdi ol.
