Qutqarýshylardyń jaǵdaıy máz emes - vıtse-mınıstr Ilın
ASTANA. QazAqparat - Búgin QR Іshki ister vıtse-mınıstri ıÝrıı Ilınniń qatysýymen ótken baspasóz máslıhatynda jýrnalıster Semeı qalasynda 10 jasar balanyń oıylǵan Ertis muzynyń astyna túsip, batyp ketkenin eske alyp, sol kezde qutqarýshylardyń tek súımen men kúrekke ǵana júgingenin jetkizdi, dep habarlaıdy QazAqparat tilshisi.
«Iá, aldymen balanyń ata-analaryna kóńil aıtqymyz kelip otyr. Al qutqarýshylardyń materıaldyq-tehnıkalyq jaǵdaıyna keler bolsaq, shynymen de, sýda qutqarý qyzmetiniń qazirgi jaǵdaıy máz emes. Buryn olar bólek qurylym retinde jumys istegen. Bertin kele, biz olardy Shyǵys Qazaqstan oblystyq shuǵyl qutqarý jasaǵyna qostyq. Búginde olardy jabdyqtaý deńgeıi burynǵy kórsetkishpen salystyrǵanda, 30-40 paıyzdy qurap otyr. Osyǵan baılanysty biz tek Shyǵys Qazaqstan oblysyn ǵana emes, barlyq aımaqtardyń máselesin baqylaýǵa aldyq», - deıdi Ilın.
Vıtse-mınıstrdiń aıtýynsha, búginde barlyǵy qarjyǵa tirelip otyr. degenmen 2018 jylǵa arnalǵan jospardyń aıasynda qutqarýshylardyń materıaldyq-tehnıkalyq jaǵdaıyn sheshý kózdelip otyr.
Aıta keteıik, aldaǵy ýaqytta aýa-raıy kúrt jylynyp ketken jaǵdaıda Aqmola, Shyǵys Qazaqstan, Batys Qazaqstan, Qaraǵandy, Qostanaı jáne Soltústik Qazaqstan oblystarynyń keı aýmaqtaryn sý basýy qaýpi bar. Naýryzdyń aıaǵy men sáýirdiń basynda sý tasqyny boljanyp otyr. Osyǵan baılanysty respýblıka boıynsha ondaǵan shaqyrymnyń bógenderi jóndelip, jer asty qubyrlar tazartyldy. Eldi mekenderden mıllıondaǵan tekshe metr qar shyǵaryldy. Qazirgi kezde sý tasqyny saldarlaryn aldyn alý jáne joıý úshin 8 myń tonnadan astam janar-jaǵarmaı, 219 myń tonna ınertti materıaldar, 958 myń qap jáne 19,8 tonna jarylǵysh zat qory daıyndaldy. Ásirese, Qyzylorda oblysynda sý tasqyny qaýpi kúsheıip tur.
