Qutqarýshylardyń ortasha aılyǵy 337 myń teńgege jetti – Álıhan Smaıylov

ASTANA. QazAqparat – Úkimet basshysy Álıhan Smaıylov Senat depýtattarynyń saýalyna bergen jaýabynda qutqarýshylardyń aılyǵy 2025 jylǵa deıin 2 ese ósetinin málim etti, dep habarlaıdy QazAqparat tilshisi.

«Memleket basshysynyń 2021 jylǵy 1 qyrkúıektegi Joldaýyn iske asyrýdyń jalpyulttyq is-sharalary jospary aıasynda 2022 jyldan bastap azamattyq qyzmetshilerdiń jekelegen sanattarynyń eńbekaqysy kóbeıtilip jatyr. Onyń ishinde azamattyq qorǵanys qutqarýshylary da bar. Olardyń eńbekaqysy laýazymdyq aılyq koeffıtsentin túzetý arqyly (2022 jyly – 1,23 (23%); 2023 jyly – 1,45 (18%); 2024 jyly – 1,71 (18%); 2025 jyly – 2 (17%)) ózgeredi. Osy túzetýlerdi eskersek, 2025 jylǵa qaraı qutqarýshylardyń aılyǵy 2 ese ósedi» dep jazady Premer-Mınıstr.

Álıhan Smaıylov bıyl qutqarýshylarǵa ómiri men zensaýlyǵyna qaýip tóndiretin jumys atqarǵany úshin laýazymdyń aılyǵynyń 70%-y kóleminde ústemeaqy belgilengenin eske salady.

«Odan bólek azamattyq qyzmetshilerdiń, bıýdjet esebinen kún kórip otyrǵan uıymdar qyzmmetshileriniń, qazynashylyq kásiporyn jumysshylarynyń eńbegine aqy tóleý júıesi boıynsha qutqarýshylardyń laýazymdyq eńbekaqysyna atqaryp júrgen jumysynyń aýyrlyǵyna qaraı bazalyq aılyqtyń 20%-ynan 300% deıin ústemeaqy men qosymsha tólem qarastyrylǵan. Osy qabyldanǵan sharalardyń nátıjesinde qutqarýshylardyń aılyǵy qazirgi tańda orta eseppen 337 681 teńge bolyp tur», - dep jazylǵan jaýapta.