Qutqarýshylardy synamaı, alǵys aıtý kerek - mınıstr Abaev
«Men sizdiń pikirińizben kelispeımin. Bizdiń ólkede qys mezgili óte sýyq bolatynyn jaqsy bilemiz, biraq Nur-Sultan qalasynda bıyl jaýǵan qar mólsheri óte kóp. Mundaı qubylys 55 jyl buryn bolǵan. Bıyl jaýǵan qar mólsheri boıynsha rekord ornatty», - dedi Dáýren Abaev «Ashyq dıalog» baǵdarlamasynda.
Ol qutqarý qyzmeti azamattar qar astynda qalmas úshin qoldan kelgenniń bárin jasaǵanyn aıtty.
«Eń basynda mobıldi operator, BAQ, radıo arqyly tasjoldar jabyq ekeni týraly aqparat taratylyp, qandaı jaǵdaı bolsa da jolǵa shyǵýǵa bolmaıtyny týraly habarlanady. Adam ómiri bárinen mańyzdy ekenin umytýǵa bolmaıdy. Boran bolǵan kúnderi elimiz boıynsha 1 500 adam men 600-den astam tehnıka qutqarý jumystaryna jumyldyryldy. Bul kezde TJK ǵana emes, áskerı qyzmetkerler, polıtsııa qyzmetkerleri, jol qyzmeti men ákimdik qyzmetkerleri, dárigerler de jumyldyryldy. Bul adamdar táýlik boıy jumys istedi», - dedi ol.
Sondaı-aq, mınıstr qyzmetine adal mamandar týraly mysal keltirdi.
«Borandy kúnderdiń birinde Pavlodar oblysyndaǵy Jetekshi aýylynyń turǵynynda ınfarkt bolǵan. Qar qalyń bolǵandyqtan jedel járdem kóligi úıdiń aýlasyna jete almaı qalǵan. Dárigerler úıge jaıaý jetip, naýqasty eki shaqyrym qashyqtyqta turǵan kólikke deıin zembilmen kóterip alyp kelgen. Mundaı mamandar qandaı qurmetke bolsyn laıyqty. Taǵy bir mysal: Temirtaý-Qaraǵandy baǵytyndaǵy tasjolda Damır Qudaıbergenov esimdi azamat patrýldýge shyǵarylǵan. Ol áriptesterimen birge 40 adamnyń ómirin qutqaryp qaldy. Onyń fotosýreti Qaznette tarap ketti. Qutqarýshylardyń kómegimen 3 myńnan astam adam evakýatsııalandy. Bul sandar óse berýi múmkin. Qutqarýshylardy synamaı, alǵys aıtý kerek. Jolda qalǵandarǵa, qutqarýshylarǵa óz erkimen kómektesken adamdar týraly da umytpaýymyz kerek. Olardyń biri ystyq tamaq alyp kelse, endi biri benzın berip, endi biri jatatyn jer usyndy», - deıdi Abaev.
