Qutqarýshylar jyl basynan beri 7 myńǵa jýyq adamdy aman alyp qalǵan - QR TJM alqa otyrysy
Alqa otyrysyna Premer-Mınıstrdiń birinshi orynbasary Roman Sklıar qatysty, dep habarlaıdy QazAqparat QR Tótenshe jaǵdaılar mınıstrliginiń baspasóz qyzmetine silteme jasap.
Alqa otyrysyn asha otyryp, Tótenshe jaǵdaılar mınıstri Syrym Sháriphanov sońǵy jyl kúrdeli bolǵanyn, biraq mınıstrlik barlyq qoıylǵan mindetterdiń oryndalǵanyn atap ótti.
Sonymen qatar, mınıstr Memleket basshysynyń tótenshe jaǵdaılar sanyn azaıtý jáne azamattardyń qaýipsizdigin qamtamasyz etýge baǵyttalǵan sharalar keshenin iske asyrý boıynsha birqatar mindetter qoıǵanyn habarlady.
«2023 jyldyń ótken kezeńinde qabyldanǵan sharalar nátıjesinde el boıynsha TJ-da zardap shekkenderdiń sany 13,3%-ǵa, qaza tapqandar sany 8,4%-ǵa qysqardy», - dep Syrym Sháriphanov habarlady.
Sonymen qatar «TJM bólimsheleri 2023 jyldyń birinshi jartjyldyǵynda 42 myńnan astam ret tótenshe jaǵdaılar ornyna shyqty, 7 myńǵa jýyq adamdy qutqardy, 7 myńnan astam adamdy evakýatsııalady, 2 500-den astam azamatqa alǵashqy medıtsınalyq kómek kórsetildi», - dep Syrym Sháriphanov qosty.
Tabıǵı jáne tehnogendik sıpattaǵy asa iri tótenshe jaǵdaılardy joıý kórshiles óńirlerden toptardy tartýdy talap etti, bul kúrdeli jaǵdaılarda zalal men shyǵyndy barynsha azaıtýǵa múmkindik berdi.
Syrym Sháriphanov TJ aldyn alý jáne joıý jónindegi memlekettik saıasatty iske asyrý josparly negizde jalǵasyp jatqanyn atap ótip, mınıstrlik qyzmetiniń taıaýdaǵy kezeńde aýqymdy jáne maqsatty jumys júrgiziletin negizgi basym baǵyttaryn aıqyndady.
Alqa otyrysynyń birinshi bóliginde birinshi vıtse-mınıstr Ibragım Kúlshimbaev azamattyq qorǵaý organdarynyń atqarǵan jumysy týraly baıandama jasady.
Alqa otyrysynyń birinshi bóliginiń qorytyndysyn shyǵara kele, Roman Sklıar ujymǵa atqarylǵan kúrdeli jumystary úshin alǵysyn bildirip, júıeli sheshýdi talap etetin birqatar ózekti máselelerdi atap ótti. Sonymen qatar, aldyn alý sharalaryn qabyldaý, TJ barlyq túrlerine den qoıýdy kúsheıtý, jylytý jáne sý tasqyny maýsymdaryna aldyn ala daıyndyq úshin TJM úılestirýshi rólin nyǵaıtý qajettigi atap ótildi.
Alqa barysynda órt qaýipti kezeńnen ótý, azamattyq qorǵanys is-sharalary, respýblıkadaǵy ónerkásiptik qaýipsizdik jaǵdaıy, qyzmettik-áskerı tártip máseleleri jónindegi óńirlik departamentterdiń bastyqtary da tyńdaldy.
Málik Ǵabdýllın atyndaǵy Azamattyq qorǵaý akademııasy bastyǵynyń mindetin atqarýshy Qýanyshbek Karmenov TJM qatardaǵy qyzmetkerden basshylyq quramǵa deıin oqý ornynyń kadrlardy daıarlaý máseleleri boıynsha aqparatty jetkizdi.
Alqa aıasynda qyzmettiń ózekti baǵyttary boıynsha jumys keńesteri de ótti.
