Qutqarýshylar júrek tusyna temir kirgen kólik júrgizýshisin aman alyp qaldy
QYZYLORDA. QazAqparat - Qyzylorda qalasynda BMV kóligi janarmaı quıý stansasynyń qorshaýyna soǵyldy. Aldyńǵy terezeden ótip, júrgizýshiniń keýdesine kirgen qorshaýdyń temirin alyp shyǵý úshin oqıǵa ornyna qutqarýshylar shaqyryldy, dep habarlaıdy QazAqparat tilshisi.
Oblystyq TJD-dan málim etkendeı, 20 qyrkúıek kúni saǵat 06.23-te Ońtústik óńirlik aeroutqyr jedel qutqarý jasaǵynyń kezekshilik bólimine Abaı dańǵyly jáne Bókeıhan kóshesiniń qıylysy mańynda jol kólik apaty bolǵany habarlandy. Oqıǵa ornyna 4 qutqarýshy jáne 1 tehnıka jóneltildi.
Anyqtalǵandaı, BMV markaly kóliktiń júrgizýshisi rýlge ıe bola almaı, janarmaı quıý stansasynyń qorshaýyna soǵylǵan. Qatty soqqydan qorshaýdyń temiri aldyńǵy terezeden ótip, júrgizýshiniń keýdesine - júrek tusyna kirgen.
Qutqarýshylar júrgizýshiniń basyn qorǵanysh materıalmen jaýyp, temirdi kesýge kirisken.
Habarlanǵandaı, jedel jasaq qyzmetkerlerine tiri adamnyń denesine kirgen temirdi kesý qıynǵa soqqan. Olar metaldy múmkindiginshe tyǵyz ustap turýǵa tyrysqan. Sebebi aýyrsynýdan shok týyndap, zardap shegýshige qosymsha zııan kelýi múmkin edi. Júrgizýshi esten talyp qalmas úshin qutqarýshylardyń biri onymen jumysy, otbasy týraly áńgimelesip turǵan. Abyraı bolǵanda, qutqarý operatsııasy sátti ótken.
Zardap shegýshi keýdesindegi temirdiń qalǵan bóligimen jedel járdem qyzmetkerlerine tapsyryldy. Qutqarýshylardyń jedel is-áreketiniń nátıjesinde avtokólik júrgizýshisi tiri qaldy.
