Qutqarýshylar jarylǵysh zatty tonnalap jınap qoıdy
ASTANA. QazAqparat - QR Іshki ister vıtse-mınıstri ıÝrıı Ilınniń aıtýynsha, jergilikti bılik organdary men qutqarýshylar bıylǵy sý tasqyny kezeńin apatsyz ótkizýge tyńǵylyqty daıyndalyp jatyr.
Osy oraıda Qazgıdromettiń boljamdary negizge alynady, dep xabarlaıdy QazAqparat tilshisi.
Aldaǵy ýaqytta aýa-raıy kúrt jylynyp ketken jaǵdaıda, Aqmola, Shyǵys Qazaqstan, Batys Qazaqstan, Qaraǵandy, Qostanaı jáne Soltústik Qazaqstan oblystaryn keı aýmaqtaryn sý basýy qaýpi bar. Naýryzdyń aıaǵy men sáýirdiń basynda sý tasqyny boljanyp otyr. Osyǵan baılanysty respýblıka boıynsha ondaǵan shaqyrymnyń bógenderi jóndelip, jer asty qubyrlar tazartyldy. Eldi mekenderden mıllıondaǵan tekshe metr qar shyǵaryldy. Qazirgi kezde sý tasqyny saldarlaryn aldyn alý jáne joıý úshin 8 myń tonnadan astam janar-jaǵarmaı, 219 myń tonna ınertti materıaldar, 958 myń qap jáne 19,8 tonna jarylǵysh zat qory daıyndaldy. Halyqty evakýatsııalaý jaǵdaıyna 1707 qabyldaý pýnkti daıyn tur. Sondaı-aq basqa jerge kóshiriletin turǵyndarǵa qajetti tamaq ónimderi men aýyz sý qory ázirlendi.
«Memlekettik azamattyq qorǵaý júıesi basqarý organdarynyń kóktemgi kezeńindegi sý tasqyny daıyndyǵyn tekserý maqsatynda aǵymdaǵy jylǵy 2017 jylǵy 9-10 naýryz aralyǵynda «Kóktem-2017» respýblıkalyq komandalyq-shtabtyq oqý-jattyǵýlar ótkizilgen bolatyn. Barlyq oblysta, Astana jáne Almaty qalalarynda avarııalyq-qutqarý qyzmetteri men quralymdary bólimshelerimen, oblystyq azamattyq qorǵaý qyzmetterimen kóktemgi kezeńdegi TJ-ǵa den qoıý boıynsha avarııalyq-qutqarý jáne kezek kúttirmeıtin jumystardy júrgizýdiń praktıkalyq is-qımyldaryn pysyqtaý boıynsha taktıkalyq-arnaıy oqý-jattyǵý men jattyǵýlar uıymdastyryldy», - dedi Ilın Astanada ótken baspasóz máslıxatynda.
