Qutqarýshylar jaǵajaılarda arnaıy jattyqqan ıtterdi paıdalanýda – ShQO

ÓSKEMEN. QazAqparat – Shyǵys Qazaqstan oblysyndaǵy sý aıdyndarynyń jaǵalaýlaryn qadaǵalaý jumystaryna arnaıy jattyqqan ıtter tartylýda, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, sý aıdyndaryndaǵy qaýipsizdikti qutqarýshylardan basqa arnaıy jattyqqan ıtter de qadaǵalaýda. Tórt aıaqty kómekshiler kásibı mamandardan esh kem túspeıdi.

«Osy jazda qutqarýshylarǵa ártúrli tótenshe jaǵdaılarda zardap shekkenderdi izdeýge Alesıa, Vılson jáne Hıt laqap atty labradorlar kómektesedi. Qutqarýshylar tyıym salynǵan jáne qaýipti jerlerde shomylyp júrgen adamdy anyqtasa oǵan profılaktıkalyq maqsatta túsindirý jumystary júrgizilip, nusqama beriledi. Barlyq ýaqytta departament mamandarynyń serigi – osy jattyqqan ıtter. Olar kez kelgen sátte kómekke kelýge ázir. Qazirgi ýaqytta ıtterdi daıyndaý jáne sýǵa batyp bara jatqan adamdy qutqarýdy úıretip, sertıfıkat berý máselesi qarastyrylýda», - dep habarlady vedomstvo ókilderi.

TJD-nyń kınolog-mamandarynyń qyzmettik ıtterdi daıyndaýda tájirıbeleri jeterlik. Negizinen ıtterdiń arasynda Labrador tuqymynyń orny erek. Ol óziniń ınstınktimen, adamǵa degen súıispenshiligimen, batyldyǵymen, aqylymen erekshelenedi. Sondaı-aq saǵatyna 5 shaqyrym jyldamdyqpen júze alady.