Qutqarýshylar úıge shyrsha ornatqan kezdegi qaýipsizdik sharalaryn túsindirdi

ÓSKEMEN. QazAqparat – Shyǵys Qazaqstan oblysynyń qutqarýshylary úıge shyrsha ornatqan kezdegi qaýipsizdik sharalaryn túsindirip berdi, dep habarlaıdy QazAqparat tilshisi.

Jańa jyl merekesi qarsańynda halyqtyń óz úılerin bezendiretindigi belgili. Alaıda kópshilik shyrshany qalaı qaýipsiz ornatý kerektigin bilmeıdi. Bul jóninde ShQO TJD Memlekettik órt baqylaý basqarmasy bastyǵynyń orynbasary Rústem Sembaev aıtyp berdi.

«Shyrshadan keletin qaýipterdiń biri – onyń qulaý múmkindigi. Sondyqtan úıge kishkentaı shyrshany tańdaǵan jón. Ol neǵurlym bıik bolsa, ony bekitý soǵurlym qıynǵa túsedi. Shyrshany jylytý qurylǵylarynan, radıatorlar men shamdardan alysqa ornatý qajet. Ony tek arnaıy jasalǵan elektrli gırlıandalarmen bezendirgen abzal. Balalar gırlıandalardy óz betinshe qospaýy tıis. Úıden ketip bara jatqanda, shyrshany elektr toǵynan ajyratý kerek», - dedi ol.

Osy rette, TJD mamandary arnaıy eksperıment júrgizip kórgen. Olar órttiń qanshalyqty tez taralatynyn kórsetý úshin jasandy shyrshany órtedi.

«Shyrsha 20 sekýndtyń ishinde tolyq janyp ketedi eken. Buǵan arnaıy júrgizgen eksperıment kezinde kóz jetkizdik», - dedi departamenttiń baspasóz hatshysy Marına Lıskova.