Qutqarýshylar tikushaqpen Qaraǵandy oblysyndaǵy ózen-kólderdi barlap qaıtty
QARAǴANDY. QazAqparat - Qaraǵandy oblysy ákiminiń orynbasary men Tótenshe jaǵdaılar departamentiniń bastyǵy sý tasqynyna qarsy oblystyq shtab otyrysyn ótkizdi, dep habarlaıdy QazAqparat tilshisi.
Іs-shara barysynda Nura jáne Sherýbaı-Nura ózenderiniń arnasy, Buqar jyraý jáne Abaı aýdandaryndaǵy sý qoımalary tikushaqpen barlanyp, sondaı-aq Buqar Jyraý aýdanynyń Sadovoe kentindegi TJD bólimsheleriniń daıyndyǵy tekserildi.
Arnalardy tekserý barysynda muz jamylǵysy jáne seń keptelisiniń joqtyǵy anyqtaldy. Sý tolyǵymen arnalar arqyly aǵyp jatyr.
15 naýryzdan bastap óńirdegi ózenderde muz jarý jumystary júrgizilip jatyr. Búgingi kúni Qarqaraly jáne Buqar jyraý aýdandarynyń 4 ýchaskesinde jarylys júrgizildi. Sondaı-aq Osakarov, Abaı jáne Nura aýdandarynyń aýmaqtarynda jarylys jumystaryn júrgizý josparlanýda.
1 naýryzdan bastap oblys aýmaǵynda azamattyq qorǵaý júıesi joǵary daıyndyq rejiminde jumys isteıdi.
Qalalar men aýdandardyń azamattyq qorǵaý kúshteri de daıyn, barlyǵy 6,4 myń adam jáne 2,4 myń tehnıka bar.
Sonymen qatar, barlyq jerde úgit-nasıhatty paıdalana otyryp, sý tasqyny kezindegi qaýipsizdik sharalary týraly halyqty aqparattandyrý boıynsha is-sharalar júrgiziledi. Turǵyndar arasynda 170-ten astam jıyn jáne 130-ǵa jýyq úgit-nasıhat reıdi ótkizildi.
