Qutqarýshylar teńizge qulaǵan Mı-8 qaldyqtaryn Shpıtsbergennen tapty
ASTANA. QazAqparat - Beısenbi kúni Shpıtsbergen arktıkalyq arhıpelagynyń jaǵajaıynda joǵalǵan reseılik Mı-8-diń qaldyqtary izdeý jumystarynyń tórtinshi kúninde teńizdiń 209 metrlik tereńdiginen tabyldy, dep habarlaıdy TASS.
Norvegııalyq qutqarýshylar tikushaqtyń bortynda bolǵan joǵalǵan segiz reseılikti tirileı tabý endi múmkin emes ekendigin, izdeý-qutqarý operatsııalaryn toqtatqandyqtaryn málimdedi. Norvegııada qabyldanǵan protsedýraǵa sáıkes, jolaýshylar máıitteri men ekıpajdy izdeý operatsııasy bastaldy, oǵan Shpıtsbergen gýbernatory Kerstın Askholt pen arhıpelag polıtsııa basqarmasy jaýapty.
Beısenbi, 26 qazan kúni reseılik Mı-8 qar jaýyp turǵan kezde Pıramıda eldi mekeninen 80 shaqyrymdyq qashyqtyqtaǵy reseılik kenshiler kenti - Barentsbýrgke ushyp shyqqan. Reseı memlekettik "Arktıkýgol" tresiniń lızınginde bolǵan "Konvers Avıa" áýe kompanııasy tikushaǵynyń bortynda ekıpajdyń bes múshesi men Arktıka jáne Antarktıka ǴZI-ynyń úsh qyzmetkeri bolǵan.
Apatty jaǵdaıdy Mı-8 qonýy josparlanǵan Barentsbýrg mańyndaǵy Heer múıisinen soltústik batysqa qaraı eki shaqyrym qashyqtyqtaǵy sý betindegi kúıikten qalǵan qaldyqtar men aýa kópirshikteri ǵana aıǵaqtady.
Іzdeý jumystary aýa raıynyń qolaısyzdyǵy men mańaıdy kórýge múmkinshiliktiń bolmaýynan kúrdelene tústi. Arhıpelagta tap qazir - polıar túni.
