Qutqarýshylar sýǵa shomylý maýsymynda qazaqstandyqtardyń qaýipsizdigin saqtaýǵa daıyn
ASTANA. QazAqparat - Qutqarýshylar sýǵa shomylý maýsymynda qazaqstandyqtardyń qaýipsizdigin saqtaýǵa daıyn. Bul týraly búgin brıfıngte QR Tótenshe jaǵdaılar mınıstrliginiń resmı ókili Rýslan Imanqulov málim etti.
Onyń aıtýynsha, mınıstrlik sýda qutqarý qyzmetteriniń jalpy shtattyq sany 911 birlik 58 sýda qutqarý stantsııasynyń, 22 qutqarý beketiniń, 13 súńgýir avarııalyq-qutqarý jasaqtary men 7 manevrleý-izdeý toptarynyń jeke quramyn joǵary ázirlikke keltirdi.
Sýda qutqarý qyzmetteri sý aıdyndaryndaǵy tótenshe jaǵdaılarǵa jedel den qoıý jáne 2014 jylǵy sýǵa shomylý maýsymy kezeńinde shuǵyl rejımdegi jumys úshin 140 birlik avtomobıl jáne qutqarý tehnıkasyn, 440 birlik júzý quralyn, 1374 birlik súńgýir jabdyǵy men jaraǵyn daıyndady, janar-jaǵarmaı men azyq-túlik ónimder qoryn jasady.
«Budan ózge Tótenshe jaǵdaılar departamentteri 2014 jylǵy sýǵa shomylý maýsymy kezeńinde adamdardyń sý aıdyndarynda qaza bolýyna jol bermeý jónindegi birlesken is-sharalar josparyn ázirledi jáne olar jergilikti atqarýshy organdarmen, ishki ister departamentterimen, bilim berý, densaýlyq saqtaý, ishki saıasat, dene shynyqtyrý jáne sport basqarmalarymen kelisildi», - deıdi ol.
Vedomstvo málimeti boıynsha, elimizdiń sý aıdyndarynda adamdardyń qaýipsizdigin arttyrý, oqys oqıǵalar sanyn azaıtý, adamdardyń sýdaǵy qaýipsiz demalysyn uıymdastyrý boıynsha jumysty belsendendirý maqsatynda sýda qutqarý qyzmetteri 11 696 sý aıdynyn tekserdi. Sýǵa shomylýǵa arnalǵan 480 demalys orny belgilendi, onda sýdyń túbin qaýipti zattardan tazartý jumystary júrgizildi.
«Oblystar, qalalar men aýdandar tótenshe jaǵdaılardyń aldyn alý jáne olardy joıý jónindegi komıssııa otyrystary ótti, onda azamattardyń sý aıdyndarynda qaza bolýyna jol bermeý boıynsha is-sharalar, onyń ishinde sý aıdyndarynda, demalý oryndary men balalar lagerlerinde qalalyq, aýdandyq jáne aýyldyq ákimdikter ókilderi ishinen adamdar ómiriniń qaýipsizdigine jaýapty adamdar belgilenedi», - deıdi R. Imanqulov.
