Qutqarýshylar «Óskemen-Altaı» joly boıyndaǵy taýlarda jarylys jasady

ÓSKEMEN. QazAqparat – «Óskemen-Altaı» tasjolyndaǵy taý bókterinde jarylystar jasaldy. Bul qar kóshkinin jasandy jolmen túsirý úshin qolǵa alynǵan shara, dep habarlaıdy QazAqparat tilshisi.

Shyǵys Qazaqstan oblysy Tótenshe jaǵdaılar departamenti baspasóz qyzmetiniń málimetine súıensek, búginde óńir aýmaǵynda qar kóshkini júrý qaýpi saqtalyp otyr. Soǵan oraı «Qazseldenqorǵaý» ShQ fılıalynyń qyzmetkerleri men qutqarýshylar profılaktıkalyq kóshkin túsirý jumystaryn júrgizdi.

«Óskemen-Altaı» tasjolynyń 58-66 shaqyrymyndaǵy taý bókterinde 4 ret jarylys jasaldy. Sonyń nátıjesinde 11 400 tekshe metr qar túsirilgen. Birden joldy qardan tazartý jumystary qolǵa alyndy», - delingen aqparatta.

TJD qyzmetkerleri qar kóshkini qaýpine oraı turǵyndarǵa barynsha abaı bolýdy, eshbir jaǵdaıda taýǵa shyqpaýdy eskertti. Qandaı da bir máseleler boıynsha «112» nómirine qońyraý shalýǵa bolady.

Foto: ShQO TJD baspasóz qyzmeti