Qutqarýshylar Lenın shahtasyndaǵy qaıǵyly oqıǵanyń mán-jaıyn aıtyp berdi

ShAHTINSK. QazAqparat - Lenın atyndaǵy shahtada bolǵan qaıǵyly oqıǵa ornyna birinshi bolyp kelgen qutqarýshylar kenshilerdi qalaı qutqarǵandaryn aıtyp berdi, dep habarlaıdy QazAqparat tilshisi.

«KÁAQQ ROSh» JShS Qaraǵandy fılıalynyń alty qutqarýshy bólimshesi «ArselorMıttal Temirtaý» AQ KD Lenın atyndaǵy shahtasynda apat ornyna alǵashqylardyń biri bolyp keldi. 830 metr tereńdikte qutqarý jumystaryna 35 adam qatysty.

«Jumystar eki ýchaskede júrgizildi. Ár jerde eki adam eńbek etti. Taǵy bir kenshi jumysty basqarǵan. Tótenshe jaǵdaı oryn alǵan jerge kelgen kezde biz úsh adamnyń denesin taptyq. Biraz ýaqyttan keıin ekinshi núktede – taǵy bir marqumdy, sonan soń qaza bolǵan besinshi kenshini taýyp aldyq. Oqıǵa kenetten oryn alǵandyqtan, kenshiler ózin-ózi qutqarý qurylǵylaryna qosylyp úlgermeı qalǵan», - dedi «KÁAQQ ROSh» JShS Qaraǵandy fılıaly dırektorynyń orynbasary Jumat Ókenov.

Apat ornynda úıindiler joq, jer jynysy qulamaǵan.

Esterińizge sala keteıik, búgin túnde shahtad «ArselorMıttal Temirtaý» AQ Kómir departamentiniń Lenın atyndaǵy shahtasynda apat bolyp, saldarynan 5 kenshi qaza tapty.

TJ faktisi boıynsha QR QK 277-babynyń 3-bóligi boıynsha qylmystyq is qozǵaldy.

Foto: instagram.com/shk_kz