Qutqarýshylar qys bastalǵaly kóligi buzylyp, dalada qalǵan 150 adamdy qaýipsiz aımaqqa kóshirdi

Bul týraly búgin Tótenshe jaǵdaılar mınıstrliginde ótken brıfıngte málim boldy.

Mınıstrliktiń baspasóz qyzmetiniń ókili Lıýbov Shaposhnıkovanyń málimetterine qaraǵanda, bıylǵy jyldyń qys mezgilinde tabıǵattyń tosyn minezimen baılanysty tótenshe jaǵdaılardyń oryn alýy ábden yqtımal. Ádette mundaı jaǵdaıda jergilikti jáne respýblıkalyq baǵytta jabylyp qalatyn birneshe baǵyttar bar. «Oǵan baılanysty elimizde arnaıy dabyl qaǵylyp, eskertýler jasalyp ta jatqanyna qaramastan azamattar jolǵa shyǵýlaryn tyıar emes», dedi mınıstrlik ókili.

Onyń sózinshe, qys mezgili bastalysymen tótenshe jaǵdaılar salasynyń aımaqtaǵy otrıadtary «Nefteıýgansk-Shymkent» baǵytynda ketip bara jatqan avtobýstan 53 azamatty qaýipsiz aımaqqa kóshirdi. Olardyń barlyǵy da Tájikstan azamattary bolyp shyqty. Tap osy kúni «Nsovosibir-Tashkent» baǵytynda jyljyp bara jatqan kólikten 48 Ózbekstan azamaty qutqarylǵan. «Sondaı-aq «Taraz-Almaty» baǵytynda ketip bara jatqan avtobýstan 36 jolaýshy aman alynyp qaldy. 3-4 jeltoqsan kúnderi tek Qostanaı oblysynda qutqarýshylar omby qardyń astynda qalǵan 12 adamdy alyp shyqty. Onyń bireýi Bolgarııa azamaty bolyp shyqty. Ázirge dalada úsip qalǵan adamdar týraly eshqandaı derek joq», dedi L. Shaposhnıkova.