Qutqarýshylar Qostanaı oblysyndaǵy Baǵanaly kenti mańynda órtpen kúresýde

QOSTANAI. QazAqparat - Búgin órttiń negizgi oshaqtary sóndirildi. Qazirgi kezde tótenshe jaǵdaı qyzmetkerleriniń bar kúshi Qostanaı oblysy Áýlıekól aýdanyndaǵy Baǵanaly aýyly mańyndaǵy órtti sóndirýge jumyldyryldy, dep habarlaıdy QazAqparat tilshisi.

«Búginde órttiń negizgi oshaqtary sóndirildi. Bar kúshti jumyldyryp, jumystar jalǵasyp jatqan jalǵyz aýdan – Baǵanaly eldi mekeni. Kenttiń ózine qaýip tónip turǵan joq. Byqsyp janýdyń jekelegen oshaqtary bar», - dedi QR Tótenshe jaǵdaılar mınıstri ıÝrıı Ilın.

Mınıstrdiń sózinshe, bıik betkeılerde órt baıqalyp otyrǵan joq. Biraq kóp jaǵdaı aýa raıyna baılanysty bolady.

«Erteń jeldiń jyldamdyǵy sekýndyna 28 metrge deıin jetetini boljanyp otyr. Bul órttiń qaıta tutanýyna alyp kelýi múmkin. Qazirgi kezde barlyq bólimsheler belsendi qyzmet atqaryp otyr. Túnde kúzet qoıylady, jaǵdaıdy baqylaımyz. Shtab jumysyn jalǵastyryp jatyr, ázirge taratylǵan joq», - dedi Tótenshe jaǵdaılar mınıstrliginiń basshysy.

Buǵan deıin Qostanaı oblysynda eldi mekenderge tóngen órttiń tutaný qaýpi joıylǵany týraly habarlanǵan bolatyn.

Mınıstr sendirgendeı, qutqarýshylar birer kúnde órtti tolyǵymen joıady.