Qutqarýshylar Qaskeleń ańǵarynda joǵalǵan eki jasar balany tapty (FOTO)
ALMATY. QazAqparat - Qutqarýshylar Qaskeleń ańǵarynda joǵalǵan eki jasar ul balany tapty.
Almaty TJD baspasóz qyzmetiniń aqparatynsha, 13 maýsymda saǵat 00:50-de Qaskeleń shatqalyndaǵy Іle-Alataý saıabaǵy qyzmetkeriniń 2014 jyly týǵan balasy joǵalǵany týraly habar tústi. 7 adamnan turatyn QR ІІM Tótenshe jaǵdaılar komıteti respýblıkalyq jedel-qutqarý jasaǵynyń toby men kınologtar oqıǵa ornyna shyqty. Olar úı mańyndaǵy aýmaqty, sonymen qatar baspana mańyndaǵy joldyń 2 shaqyrymyn tekserdi.
Saǵat 05:40 13 qutqarýshy men 2 kınolog kómekke keldi. Kún shyqqanda jol mańynda balanyń aıaq kıimi tabyldy. Іzdeýge eki top jumyldyryldy.
Saǵat 10:35 taý mańyndaǵy aýmaqty tintigen bir top tastardyń arasynda uıyqtap jatqan balany tapty. Balanyń jaǵdaıyn teksergen dáriger onyń ómirine esh qaýip tónip turmaǵanyn aıtty. Qutqarýshylar náresteni ata-anasyna qaıtardy.
