Qutqarýshylar qar qursaýynda qalǵan 27 adamǵa kómektesti
9 qańtarda Qostanaı oblysy Áýlıekól aýdany Áýlıekól aýylynyń 15-ÓSB baılanys pýltine Sulýkól kentiniń syrtynda jolaýshylary bar jeńil avtokólik qar qursaýynda qalǵany týraly habarlama tústi. Qutqarýshylar dereý áreket etip, shaqyrý ornyna ótimdiligi joǵary Kamaz-vahtovka tehnıkasy men jeke quramnyń 3 adamyn jiberdi.
Avtomashına oblystyq mańyzy bar «Áýlıekól-Joldama» avtojoly ýchaskesinde, Sulýkól kentinen 40 shaqyrym jerden tabyldy.
Jolaýshylar kóliginde 5 adam aýa raıynyń qolaısyzdyǵyna baılanysty qar qursaýyna tap boldy. Aýa raıynyń nasharlaýy, temperatýranyń kúrt tómendeýi nátıjesinde olar mingen kólik isten shyqqan.
Qutqarýshylar jolaýshylardy Áýlıekól kentine evakýatsııalap, jergilikti mektep-ınternatta ornalasqan jylytý pýnktine ornalastyrdy, onda olar ystyq tamaqpen qamtamasyz etildi.
Sol kúni taǵy bir qutqarý operatsııasyn Qamysty aýdanynyń TJ bóliminiń qyzmetkerleri uıymdastyrdy. Respýblıkalyq mańyzy bar «Qostanaı-Qarabutaq» avtojolynda «Mersedes» markaly avtokólik synǵan. Qutqarýshylar sheteldik kólikti jóndeýge kómektesti jáne Lıvanovka kentiniń jylytý pýnktine 7 adamdy, onyń ishinde 5 balany jetkizdi.
Bir saǵat óter-ótpesten qutqarýshylar taǵy bir shaqyrýdy qabyldady. Lıvanovka aýylynan 3 shaqyrym qashyqtyqta ornalasqan respýblıkalyq mańyzy bar «Qostanaı-Qarabutaq» avtojolynda júk avtomashınasy qalyp qoıǵan. 2 adam aqaýly mashınadan shyǵarylyp, Lıvanovka kentiniń jylytý pýnktine jetkizildi.
Avarııalyq-qutqarý jumystary sátti ótti. Qutqarylǵandardyń barlyǵy medıtsınalyq kómekke muqtaj emes.
Aǵymdaǵy jyldyń 9 qańtarynda Shyǵys Qazaqstan oblysy TJD qutqarýshylary qolaısyz aýa raıynda jolda qalǵan turǵyndarǵa kómekke keldi. Glýbokoe aýdanynyń Volchıha aýylynda 11 adam qala syrtyndaǵy úıde bolǵan, óńirde bir aptaǵa jýyq qar jaýǵannan jáne qarly borannan keıin olar óz betinshe úılerine orala almaǵan. ShQO TJD Jedel-qutqarý jasaǵynyń qyzmetkerleri «Sherp» avtokólikterimen kómekke keldi. Barlyq azamattar úılerine aman-esen jetkizildi, olarǵa medıtsınalyq kómek qajet bolmady.
Sondaı-aq, 9 qańtarda Qaraǵandy oblysy Aqtoǵaı aýdanynyń Abaı aýyldyq okrýginde Balqash qalasynan 30 shaqyrym jerde qar qursaýynda 2 adamy bar «ÝAZ» avtokóligi turyp qalǵany týraly habar kelip tústi. Olar TJD kúshterimen evakýatsııalanyp, Balqash qalasyna jetkizildi. Qutqarylǵandarǵa medıtsınalyq kómek qajet emes.
QR TJM temperatýranyń kúrt tómendeýimen baılanysty qolaısyz meteojaǵdaılar týraly eskertedi jáne halyqty eldi mekenderden tys jerlerge alys saparlardan bas tartýǵa shaqyrady. Respýblıkanyń kóptegen aımaqtarynda daýyldy eskertýler jarııalanǵan. Aýa raıy jaǵdaılary týraly TJM saıtyndaǵy «Jedel aqparat» bóliminde jáne «Dármen» mobıldi qosymshasynda naqty aqparat bar.
Foto: Qostanaı oblysy TJD baspasóz qyzmeti
