Qutqarýshylar Qapshaǵaı jaǵalaýynan joǵalyp ketken tórt balany tapty
ALMATY OBLYSY. QazAqparat – Jeksenbi kúni qapshaǵaı sý qoımasynyń jaǵalaýynda demalýshylar sanynyń kóptiginen tórt bala joǵalyp ketti, dep habarlaıdy QazAqparat tilshisi.
Balalardyń joǵalǵany traly habarlama Almaty oblysy Tótenshe jaǵdaılar deparatamentine (TJD) 25 shilde kúni saǵat 15:00-den keıin kelip túsken. Sońǵysy keshke 19:00 shamasynda joǵalǵan.
Oqıǵa adam kóp jınalatyn jerde Qapshaǵaıdyń ońtústik jáne soltústik jaǵalaýynda bolǵan. Adasyp ketken balalar 5-10 jas shamasynda.
Balalardy izdeýge olardyń ata-analaryna kómekke Qapshaǵaı óńiriniń Jedel izdestirý jasaǵynyń qutqarýshylarynan jasaqtalǵan top pen Qapshaǵaı qalasynyń TJ bóliminiń jedel toby keldi.
«Barlyq bala aman-esen tabyldy. Olardyń barlyǵy jaǵalaýda bolǵan. Keıbireýlerin ata-analary tapsa, keıbireýlerin qutqarýshylar tapty. Balalardyń eshqaısysy medıtsınalyq kómekti qajet etpeıdi. Almaty oblysynyń TJD qaıǵyly jaǵdaılarǵa jol bermes úshin azamattardan balalaryn qaraýsyz qaldyrmaýdy suraıdy», - dep atap ótti Almaty oblysynyń TJD baspasóz qyzmeti.
