Qutqarýshylar er nemese áıel dep bólinbeıdi, báriniki bir qyzmet - podpolkovnık Gúlnar Atyǵaeva

- Ózińiz jaıynda aıtsańyz, qaı jerdiń týmasysyz, qandaı oqý ornyn bitirdińiz, mamandyǵyńyz, eńbek ótilińiz qandaı?

- Aqmola oblysynda dúnıege kelgem. 1999 jyly Sh. Ýálıhanov atyndaǵy Kókshetaý memlekettik ýnıversıtetin ınjener-ekonomıst mamandyǵy boıynsha bitirdim. Sol jyly taǵdyrdyń aıdaýymen Kókshetaý tehnıkalyq ınstıtýtyna jumysqa turyp, eńbek jolymdy qarjy bóliminiń bas mamany bolyp bastadym.

Keıin shtattyń ulǵaıýymen jarty jyldan keıin biliktilikti arttyrý fakýltetine órtke qarsy qyzmettiń esep boıynsha tehnıgi bolyp aýystym. Alǵashqy ofıtserlik laýazymdy eki jyldan keıin aldym.

On jyldan artyq órt sóndirý qaýipsizdigi boıynsha osy salada maman daıyndaıtyn elimizdegi jalǵyz joǵary oqý ornynda Qazaqstannyń túkpir-túkpirinen kelgen jastarǵa ekonomıka, menedjment, marketıng negizderinen dáris oqydym. Tirshilik qaýipsizdigi negizderi – bul meniń ekinshi mamandyǵym.

Búginde bul salada 20 jyldyq eńbek ótilim bar, azamattyq qorǵaý podpolkovnıgimin. Jeti jyldan beri Petropavlda eńbek etip jatyrmyn. «Órt sóndirý jáne avarııalyq-qutqarý jumystary qyzmeti» MM kúsh-quraldardy jedel basqarý ortalyǵy bastyǵynyń orynbasary jáne top shtabynyń bas mamanymyn.

- Sizdiń qazirgi jumysyńyzdyń mańyzy nede, nemen aınalysasyz, nege jaýap beresiz?

- Meniń qazirgi jumysym negizinen qujattarmen baılanysty. Joǵarydan keletin tapsyrmalardyń jyldam ári sapaly oryndalýyna jaýap beremin. Barlyq aqparat, túrli baıandamalar aldymnan ótedi.

- Órt sóndirý qyzmeti salasyna kelýge ne túrtki boldy? Osy salany tańdaǵanyńyzǵa ókingen kezińiz boldy ma?

- Bul salaǵa oıda-joqta keldim. Joǵary oqý ornyn bitirgennen keıin habarlandyrýdy kórdim. Kelip, qujattarymdy tapsyryp, esh qıyndyqsyz ornalastym.

Bizdi áke-sheshemiz qatańdyqta tárbıeledi. Otbasymyzda adamgershilikti joǵary qoıyp, jaýapkershilik, tártip birinshi orynda boldy. Sodan da bolar, aǵalarym quqyq qorǵaý organdarynda jumys isteıdi. Men de qaısar minezimniń arqasynda osy salada jemisti eńbek etip kele jatyrmyn.

Árıne, ár jumystyń óz qıyndyǵy bar ǵoı. Munda da solaı. Ant qabyldaǵannan keıin buıryqty buljytpaı oryndaýǵa mindettisiń. Birinshi kezekte tártip turady. Biraq osy mamandyqty tańdaǵanyma ókingen kezim bolǵan joq. Tipti, basqa jumysqa aýysamyn, tastaımyn dep oılamappyn da.

Esime túsip otyr, jas kezim, ol kezde áli leıtenantpyn, maǵan jáne áriptesterim Dınara Berdenova men Saıda Sádýaqasovaǵa tez arada shtattyq uıymdastyrýdaǵy ózgeristerdi terip, basý mindeti qoıyldy. Sol qujattardy biz eki táýlikke jýyq ornymyzdan turmaı terdik. Bizge ishetin tamaǵymyzdy ákelip berip turdy.

Pogon taqqan qyzmette áıel, er dep bólmeıdi. Jumysty bárimen birdeı atqarasyń. Jumystyń kóptiginen túngi saǵat 00.00-ge deıin isteıtin kezder boldy.

Órt sóndirý bólimshelerine nemese joǵary oqý ornynyń zerthanalyq korpýsyna, jataqhanasyna táýliktik kezekshilikke túsetinbiz. Birneshe aılap demalysty kórmeı jumys istegen kezder boldy.

- Áıel – shańyraqtyń uıytqysy. Bala tárbıesi, odan qaldy úı tirligi bar. Bárine qalaı úlgeresiz?

- Joldasym Nurlan Baýyrjanuly - meniń áriptesim. Ol SQO TJD bastyǵynyń orynbasary. Eki qyz ósirip, tárbıelep otyrmyz. Árıne, ýaqyttyń kóp bóligi jumysta ótedi. Sol sebepti ár demalysty otbasymyzben birge, qyzyqty, ári este qalatyndaı etip ótkizýge tyrysamyz. Men tamaq pisirgendi jaqsy kóremin. Hobbıim desem de bolady. Óte qonaqjaımyn. Úıdiń berekeli bolýy, janǵa jaıly atmosferanyń qalyptasýy – bári áıelge baılanysty.

- Qyzdaryńyz sizderdiń jolyńyzdy qýyp, órt sóndirý qyzmetin tańdasa qarsy bolmaısyz ba?

- Bul qyzmette myqty minez kerek. Ekiniń biri shydaı bermeıdi. Úlken qyzym shyǵarmashylyqqa jaqyn. Kishi qyzymnyń minezi jumsaq. Men olardy basqa mamandyqta kórgim keledi.

- Kásibı mereke qarsańynda áriptesterińizge ne tiler edińiz?

- Órt sóndirýshilerdiń arasynda «Jeńderiń qurǵaq bolsyn» degen bir jaqsy tilek bar. Kúnde ólim men ómirdiń arasynda arpalysyp, árdaıym tilsiz jaýmen betpe-bet kelýge daıyn áriptesterime sáttilik tileımin.

- Áńgimeńizge rahmet!