Qutqarýshylar elorda mańyndaǵy sý tasqynynyń aldyn alý jumystarymen aınalysyp jatyr
NUR-SULTAN. QazAqparat - Kóktemniń kelýimen elordalyq Tótenshe jaǵdaılar departamentiniń qyzmetkerleri qala ákimdigimen birlesip, sý tasqynynyń aldyn alý boıynsha aýqymdy jumys júrgizip jatyr, dep habarlaıdy QazAqparat departamenttiń baspasóz qyzmetine silteme jasap.
Astanalyq qutqarýshylar qaladan bólek kórshiles aımaqtarǵa da táýlik boıy kómek kórsetýde.
Máselen, aýqymdy jumystardyń biri aǵymdaǵy jyldyń 6 sáýirinen bastap Aqmola oblysy Tselınograd aýdany Qaraótkel aýylynda erigen qar sýyn sorǵytý jumystaryn júrgizip jatyr.
Atalmysh jumystarǵa barlyǵy 3 birlik tehnıka (PNS-110, AR-2, KÝNG) jáne jeke quramnyń 10 adamy jumyldyrylǵan.
Aǵymdaǵy jylǵy 9 sáýirdegi jaǵdaı boıynsha 39 333 m3 kóleminde erigen qar sýy sorǵytyldy.
Qardy shyǵarý, ózen arnasyn keńeıtý, bógetterdi nyǵaıtý jáne sý ótý monıtorıngisiniń arqasynda qutqarýshylar men ákimdikter elordada aýqymdy sý tasqynyn boldyrmaı, sý basýdyń aldyn aldy. Bul baǵyttaǵy jumystar jalǵasýda.
