Qutqarýshylar boranda kólikpen jolda qalǵan júrgizýshilerge qandaı keńes beredi
«Kúshti boran kezinde qandaı áreket jasaý kerek? Jalǵyz shyǵýǵa tyıym salynady. Otbasy múshelerine nemese kórshińizge qaıda bara jatqanyńyzdy, qaı jerde bolatynyńyzdy habarlap, aıtyp ketý kerek. Eger sizdi eldimekennen tys jerde jaıaý júrip, baǵdardy joǵaltyp alsańyz, birden aldyńyzda tap bolǵan úıge kirip, ózińizdiń turǵan jerińizdi anyqtap, 112-ge qońyraý soǵyp, kómek suraý kerek», - dedi Esen Baıyrov qala ákimdiginiń Facebook -tegi paraqshasynda ótken onlaın baspasóz máslıhatynda.
Departament ókili baspasóz máslıhaty barysynda sondaı-aq avtokólikpen jolda qalyp qoıǵan ýaqytta qalaı áreket etý kerektigin túsindirdi.
«Qar qalyń jaýyp men daýyldy jelmen kúnniń kúrt sýýy saldarynan avtokólik joldary, temirjol magıstraly qar qursaýynda qalýy múmkin. Sol sebepti qarly boranda birneshe qarapaıym erejeni saqtaý kerek. Eger siz jolda avtokólikpen kele jatyp, boranǵa tap bolsańyz, toqtap, turǵan jerińizdi anyqtap, belgi berý úshin kólikke mata ilip qoıý kerek. Sonda sizdi qutqarýǵa kelgen azamattar tez taýyp alady. Sondaı-aq radıatordy jabý kerek. Jolda qalǵanda benzındi únemdeńizder. Peshti úzdiksiz qospańyzdar. Kólikti qar basyp qalsa esiktiń biri ashylatyndaı sańylaý bolýy tıis. Salon ishinde qamalyp qalmaý úshin omby qardy anda-sanda tazalap turǵan jón», - dedi ol.